一直係《TheMatrix》（打死我都唔會叫22乜乜！）嘅DieHardFans，等咗4年，終於等到第二集公映，宣傳攻勢驚人，你會發現最近簡直俾Matrix包圍，無處不在（就好似套戲嘅Matrix咁）。按美國人習慣，大電影必有改編Game出現，開頭聽到呢隻《EnterTheMatrix》係由電影導演華卓斯基兄弟加武指袁和平親身參與製作，真係恨到口水都流晒，玩落就……
記者：徐影龍
逢星期一至五刊出
遊戲類型：動作
對應機種：PS2、XBOX、GAMECUBE
遊玩人數：1人
開發商：Infogrames/Shiny
未玩《EnterTheMatrix》，已經被其宣傳攻勢引得心癢癢。遊戲跨平台推出PS2、XBOX及GAMECUBE三大主機版本，由編、導電影版嘅華卓斯基兄弟親自操刀。由於遊戲內容並非跟足電影版而做，而係以兩大配角Ghost及Niobe角度講述故事，需要專登獨立拍攝專屬嘅情節，器材及工作人員全屬電影原班人馬，好處係令到遊戲更富電影感，亦可補電影交代不足嘅故事情節，兩者可謂相輔相成。不過以拍電影手法製作遊戲，卻令成本暴升至二千萬美元（約港幣一億五千多萬），成為史上最貴嘅電視遊戲，的確令人咋舌。
老實講，要玩Matrix，加入電影片段或輔加情節只係配菜，一定要嚟啲袁和平師傅嘅凌空飛起定格、拗腰避子彈先得。除咗多姿多采嘅拳腳連招外，最正首推其「Focus」系統（集中力），只要一使用Focus能力，四周環境所有人同物都會「龜速」起嚟，睇清敵人動作之餘，連子彈都起晒一圈圈軌迹咁飄埋嚟，等你可以睇住嚟避，勁有MatrixFeel，新一代街機槍Game《VirtualCop3》都係抄佢咋。而且處於Focus狀態時，更可使出各類特定招式，如牆上行、凌空翻觔斗等，玩落夠晒爽。
基本玩法係每關完成指定任務，通常都係四圍行，見一個打一個，屬動作類玩法，不過隨住劇情推進，將會間歇出現其他玩法，如狙擊遠方敵人嘅Sniper槍擊玩法、喺地底去水道消滅八爪魚偵察機及高速公路上飆車等，任務尚算多樣化，亦看到製作人員誠意同心思。不過玩落，唉！美國Game即係美國Game，遊戲性始終一般，行嚟行去打打打，講真有啲悶，所以Fans玩一定要狂用Focus，咁就可以親身體會奇洛李維斯睇清子彈軌迹嘅感覺。嗱！今晚我已經Book定飛睇戲，希望睇完可以明白導演兩兄弟用遊戲加添外傳劇情嘅苦心啦！
目前香港暫時只有美版GAMECUBE同PS2版，XBOX行貨（中/英文）預計最快要5月26日左右先有，中文嘅PS2同GC版應該唔會有。值得一提係XBOX版，除咗對應1080i/p及5.1Channel外，重會推出附有防水手表嘅特別版，暫定賣$349唔算貴，Fans要昅實。代理智高遊戲科技更送出五十套《EnterTheMatrix》海報畀《蘋果》讀者，只要手持本版，今日內到指定換領處，便可免費攞到咁靚嘅海報，限額只有五十名，真係手快有手慢冇。
香港區：ProGamerShop
銅鑼灣記利佐治街2-10號銅鑼灣地帶277-278號舖
九龍區：e-gameclub.comLimited
深水埗福華街146-152號黃金商場地下36A舖
PS2：約$330
XBOX：普通版$299 特別版$349
GAMECUBE：約$330