周星馳及梁朝偉前晚出席總統戲院開幕酒會，這兩位曾經主持《430穿梭機》的影星難得聚首一堂，星爺更笑說：「我哋《430穿梭機》呀！」此外，向太陳嵐對於張栢芝被指與一眾舊愛慶祝生日大表不滿，認為報道沒有根據。
梁朝偉、周星馳、向華強夫婦、寰宇老闆林小明夫婦、張文慈、金聲院線老闆陳榮美、陳可辛、劉偉強、黃琛如及四位已出局的Cookies成員，前晚分別到銅鑼灣出席總統戲院開幕酒會。
周星馳前晚離場後，寰宇老闆林小明才現身，兩人緣慳一面，而星仔接受訪問時，剛好梁朝偉到場，這兩位二十年前均曾主持兒童節目《430穿梭機》的影星難得聚首一堂，他們合照時，星爺更笑說：「我哋《430穿梭機》呀！」問星爺籌備新戲《功夫》進度如何？他說：「沙士唔只影響一部戲，影響咗好多嘢，我哋女主角重未定，洪金寶做動作導演，我咁嘅身手唔打嘥晒啦。」
而梁朝偉被問到早前有消息指張曼玉與法國新男友暢遊東京時，他說：「我唔知呀，好多嘢都係傳，我冇問人哋啲私隱咁八卦。」
而向華強太太陳嵐前晚接受訪問時，提到楊受成旗下雜誌指張栢芝與舊男友謝霆鋒、陳曉東及陳小春於明天她生日開派對狂歡，向太激動地說：「信佢至奇呀，個名單係佢哋作㗎，佢作董特首同阿松嚟都得㗎啦。」
向太平復心情後表示，栢芝生日當天要開工，向太說：「佢都未知會去邊慶祝，唔知會唔會有party，佢到時做完1:99音樂會都好攰啦，日頭重要去老人院派禮物，fullybooking呀，本來想放假都放唔到。」
此外，陳可辛談到《見鬼》在意大利票房報捷賺大錢時說：「唔好講啦，費事俾人老笠呀。我呢套戲每兩個月就有好消息，一路慶祝咗成年，我之前諗住即拍第二集，但度唔到橋，點知因慢得福，𠵱家第二集未拍就有好反應，有十幾個地方落咗定要呀。」
劉偉強透露《無間道Ⅱ》中劉嘉玲與黃秋生將有床戲，而陳冠希亦會暗戀劉嘉玲。
採訪：卓美娟
攝影：陳慧安
