第五十六屆康城影展已經舉行咗一大半，前日美國演員兼導演雲遜加路（VincentGallo）同《沒哭聲的抉擇》女星歌兒絲雲妮（ChloeSevigny），就齊齊為佢哋部極具爭議性嘅公路電影《TheBrownBunny》宣傳。
據我羅拉所知，呢部戲有非常激嘅性愛場面，所以拍嗰陣都有特別安排，歌兒亦話呢部戲係佢從影以來最個人嘅一部戲，不過唔知係咪俾傳媒問得太多呢啲問題，歌兒喺記者會同首映禮上都全程面黑，鮮有展露笑容。
而七十二歲嘅玉婆伊莉莎伯泰萊（ElizabethTaylor），前日亦喺康城出席佢同占士甸（JamesDean）合演嘅五六年舊作《巨人》嘅特別放映會，不過玉婆喺會場外落車行咗二十米，就已經頂唔順，企喺度講兩句嘢就要搵張櫈坐，之後重好攰咁返上架車走人，認真辛苦。其後玉婆又要出席為美國愛滋病研究基金籌款嘅慈善活動，希望佢支持得住啦。
而前日陣容鼎盛嘅參賽電影《TheBarbarianInvasions》，首映禮上竟然有個着禮服嘅露宿者出現，原來佢都有份參與呢套片！