基金買入小型工業股浪潮，尚未有退熱迹象，連業績普通，但有股息派的工業股，最近股價都見異動，部份係真正基金買貨，但有部份則係幕後催谷，引誘基金注意，希望搞批股集資。
經紀陳話，成日買入工業股的惠理基金，早排買入兩隻頗新的工業股仔，一隻係信佳（912），另一隻係早排提過的中意控股（1198），自從有芬佬入股之後，信佳同中意股價顯著造好。
以中意為例，噚日股價再創上市以來新高，升9.3%，收1.40元，成交亦多咗，有329萬元。
經紀陳話，兩隻股之中，信佳可以留意，雖然股價升咗唔少，但聽聞人哋重未正式埋位做嘢。佢重話，信佳同中意上次都係大股東批貨畀基金，家陣股價走勢咁好，就算公司無打算批股，相信都會有證券行登門游說。
信佳噚日升3.1%，收1.33元，但成交就唔夠廿萬元。
慕容小初