中國手機市場龐大，想爭奪呢塊肥豬肉，學我哋董伯伯話齋，要與時並進先得㗎！Nokia日前就推出首部內置手寫中文輸入的6108，由北京Nokia設計，夠晒地道色彩。程式亦十分中國化，農曆顯示、中英字典都跟埋嚟。就連手機發布會都充滿濃厚中國色彩，喺富傳統特色嘅酒樓，請埋武術冠軍李暉邊耍劍邊Show新機，擺明話你聽呢部機係「MadeforChina」！
記者：劉耀祥 攝影：陳盛臣
外形與前作6100有幾分相近，不過揭開個鍵盤就內有乾坤，皆因6108首創內置觸控板，可以手寫輸入中文字或拉丁語系文字，夠創意之餘論方便程度亦絕對爆燈，揭開個鍵盤蓋就可以即刻手寫中文輸入，玩SMS毋須再左㩒右㩒，不論中英文都可以「暢所欲言」，認字速度及準確度亦都不錯，寫得潦草亦可以辨認到，觸控板上亦設有數個功能鍵如左、右及確定等，毋須下下手筆並用，不過暫時未支援香港字，看來6108的終極目標始終都係中國大陸的龐大市場。
6108充滿濃厚中國風格，唔單止手寫中文輸入咁簡單，就連內設程式都相當中國化，Nokia明白中國人始終都依據農曆計算節令，所以以中國人為主要市場的6108亦唔少得農曆日期顯示，加上可以農曆/西曆日期互查，想Check番自己農曆幾時生日都話咁易。除了農曆之外，更內置五行金、木、水、火、土圖片做Wallpaper，夠晒中式。若果嫌農曆五行感覺好似太「老餅」，字典功能可能更加適合年輕用家，中英/英中字典合共10萬字字庫，夠晒一般日常使用，上堂玩SMS都可以扮查字典。
現時Nokia眾多彩芒手機，暫時都未有機種可以超越4,096色顯示，6108亦照「傳統」只有4,096色顯示，在128×128像素下，畫面質素亦都清晰，顯示中文細字都睇得清楚，若用家能擺脫六萬五陰影，4,096色亦都夠用。支援MMS、JAVA及16和弦等功能，不過值得一提的就是用家除了可用Cable與PC聯繫外，重可利用SyncML，透過網絡遙距與PC進行資料同步，甚至可以安裝軟件，只要屋企部PC上緊網，就可以隨時隨地同步資料，就算唔見手機都唔怕唔見晒啲電話啦！
Nokia查詢：21366338
Nokia6108Profile
制式：GSM900/1800/1900三頻
顯示器：4,096色/128×128像素
功能：16和弦、JAVA、XHTML、電郵、MMS、電子錢包
備用時間：170-410小時
通話時間：3-7小時
體積：106×46.4×26mm
重量：98g