李卓人、麥國風、梁耀忠幾位議員前日同財爺梁錦松會面，話就話主題係商討振興經濟大計，不過題外話都講唔少，好似阿松衰多口叫阿人佢哋搞少啲反二十三條遊行就已經通晒天。
麥國風佢哋嘅話題就輕鬆好多，最多關心吓阿松個BB女「司渝」嘅近況，問佢有冇半夜醒咗喊？阿松話梗係有啦，麥國風非常同情，又再問：「你使唔使晚晚起身湊女？」點知呢位新任老竇竟然「嘩」咗一聲，答話：「點得呀？我晚晚返到屋企都已經好攰！」吓？咁邊個起身睇女？阿松好淡定咁話，總之有人啦。
睇嚟呢個老竇唔多合格，雖然要度橋振興經濟，「偷步買車」事件後又要絞盡腦汁諗計開脫，但老來得女，點都要花多啲時間同BB玩，否則個女好快就唔認得你。但阿松都講得出小司渝已經有十幾磅重，以麥國風身為護士嘅專業分析，未夠三個月嘅小司渝體重都算標準，幾健康。
講番特首下令阿松主持「振興經濟策略小組」，佢諗計諗到頭都大。有消息話佢想為小組改名，強調目標只係「推廣香港」。如果阿松真係咁做，特首唔知會唔會失望呢？重有，如果佢乜都等世衞有宣布先出台，啲商界分分鐘等唔切。
傳真︰2623-9278
電郵︰