Rebecca梁胡雪姬自從年初向小小超李澤楷告辭，準備陪仔女赴英讀書之後，忽然失去芳蹤一段時間，八方以為佢阿姐真係不理世事，原來Rebecca閉門讀書，並已經成功考得SocietyofBusinessPractitioners嘅post-graduatediploma以及Fellow（院士）資格。
Rebecca噚日攞住兩張證書畀八方哋睇，十足一個小學生攞住張成績表，十四科有六科honour，八科distinguish，真係認真唔錯，佢重笑住話，「今次對得住老竇，亦都冇輸畀細佬。」
Rebecca冇提到佢老公梁家榮同舊老闆小小超，但係八方知呢兩個男人都必定好支持佢。畢咗業咁耐再讀番書考試，真係唔容易，梁太話明，如果肥咗佬，就一定唔會講人知。
另外，沙士搞到Rebecca個仔分分鐘去唔成英國，電盈基建主席李智康叫佢唔使怕，因為數碼港同貝沙灣準備喺呢個暑假搞夏令營，有嘢學有嘢玩，連父母都照顧埋，歡迎港人送仔女入營受訓。
傳真︰2623-9278
電郵︰