雖然話非典型肺炎疫情稍為緩和，但係發展商嘅抗炎意識就一啲都冇減。噚日恒基港灣豪庭記者會後，當勞張（張炳強）親自向各位傳媒，派發抗炎藥包。千祈唔好睇小呢個抗炎香薰藥包，藥方係出自恒基地產主席四叔（李兆基）嘅御醫，即北京304醫院中心醫學博士高飛之手，裏面嘅成份好多，而且已經被肯定可以消炎同埋有袪熱嘅效用，聽聞連「六五河南腦炎」都可抑制，來頭認真唔小，直情係國寶級抗炎藥包。
聽講，藥包要同時佩戴兩個喺身至有用，重要一連戴足十五日，否則冇效。為希望人人都分享到呢個國寶藥包，四叔重公開藥方（見表），大家不妨參照吓。
不過，個藥包中藥味濃郁，唔係人人都頂得順，放喺身度，重以為敷咗跌打酒。之不過，健康係無價寶，試吓都無妨。
有股壇「長毛」稱號嘅DavidWebb，周圍去股東會踩場，地產代理界一向敢言嘅中原集團主席施永青，都嚟踩吓場，噚日臨時決定去對手美聯物業嘅周年股東會，傳媒收料到自然追訪。不過，施永青就冇辦法同美聯主席黃建業針鋒相對一番，因為噚日個股東會係由其他董事葉潔儀、張錦成同黃錦康等主持。
原來黃建業每個禮拜三都會上內地處理業務，噚日佢一身便服，開完公司嘅會議後，俾記者見到，就話趕住上大陸傾生意。聽講舊年佢都冇主持股東會。
蘭西聽美聯董事副總經理黃錦康講，原本佢哋預計DavidWebb會踩場，點知結果係施永青。
疫症侵城，各界因此發起慈善慕捐抗炎，世紀21剛成立嘅精英會，都發起「世紀21地產抗炎愛心籌款大行動」，將籌得嘅五位數字善款，協助受非典影響嘅家庭同有需要人士，噚日精英會會長鄧慶年（圖二中），副會長同埋幾名執委，到自由黨總部，將善款捐畀自由黨「工商界關懷非典受難者基金」，由自由黨常務委員兼灣仔區議員林文傑（圖二左二）代表接收。
青衣藍澄灣嘅宣傳攻勢愈來愈強勁，發展商和記黃埔，今日又有嘢宣布。示範單位設喺中環華人行，連外牆都物盡其用，響向皇后大道中同畢打行方向，掛咗幅巨型海報。官方就話一幅海報有成四米幾乘近三十米，另一幅重大到四米幾乘五十四米有多，相信都係一個紀錄。喺中區人多車多嘅旺點，夠晒搶眼，行過或者搭車經過，一眼就望到。發展商果然高招，睇怕全中環嘅人都好快知道有呢個盤，約人喺華人行等，一講就知喺邊度，實冇走雞。
利嘉閣呢排手風好順，攞到唔少獎，佢哋嘅豪宅組，早排攞咗長實畢架山一號嘅銷售總冠軍，啱啱又贏埋嘉華地產嘅九龍塘嘉豪軒「千萬豪宅銷售皇」，發展商噚日設宴請利記食飯。利嘉閣董事廖偉強話，嘉豪軒最後一個29樓空中花園單位，就係由佢哋嘅又一村分行促成。單位面積2303方呎，連雙車位以1200萬成交，呎價5211蚊。
長實畢架山一號開售以嚟有賴各大代理行落力促銷，昨日發展商「特製」嘉許狀畀表現最好嘅美聯，長實執行董事趙國雄重喺上面簽名，由高級營業經理郭子威頒發。雖然趙生唔能夠親自到場頒獎，在場人士笑言，感覺好似佢已親臨一樣，同樣有鼓勵作用。
發展商同代理開記者會一向都唔少得道具，昨日畢架山一號記者會，除咗張嘉許狀外，美聯重預備咗兩塊宣傳牌，加埋一支大錦旗，認真大堆頭，影出嚟張相，畫面特別豐富。
蘭西
電郵地址：
