外表斯文的陳慧嫻，小時候原來是馬騮精，除率領妹妹拋水袋淋墨汁外，又將擦膠塞入鼻裏，最後要入院求助。儘管父母用間尺和藤條罰她，仍然野性難馴，認真難教！
陳慧嫻在家中排行最大，下有一妹一弟，但百厭史卻遠勝弟妹。陳慧嫻日前說：「我細個時成隻馬騮咁，同阿妹喺窗口拋水袋、淋墨汁落樓下。我唔鍾意食飯，就將啲飯倒落廁所，又試過將啲鉛筆尾嘅擦膠塞落鼻哥窿，點知嚿擦膠甩咗，要入醫院掹番出嚟。」
正因慧嫻太過百厭，所以父母不時體罰她，慧嫻說：「媽咪通常攞間尺打手掌、屁股，或者兜巴星。老竇就用藤條，要跪喺佢面前俾佢打，不過打完我都照做嘅。」慧嫻回想父母當年的嚴厲，亦無非想為她好，慧嫻說：「以前俾佢哋打到飛起，但好彩我俾人打，唔係邊有𠵱家咁乖呀。」
頑皮的慧嫻最後亦嘗留班惡果，她說：「我以前唔多讀書，三年班嗰年重冧班㖭，可能知醜啦，之後成績一路好上去。五年班時，學校重派我做代表，去港督府參加園遊會，但嗰時太細，都唔知邊個係港督，淨係知有班鬼佬行埋嚟同你講吓嘢。」
慧嫻的年紀與妹妹相差一年，弟弟就比慧嫻小十歲。她表示以前跟妹妹的關係有點冷漠，反而近年妹妹結婚移民加拿大後，卻親密起來，而弟弟就是慧嫻的命根，她說：「細妹一向都似管家婆，比較堅強、獨立，呢幾年我都成日同佢講心底話。我細佬就好叻仔嘅，由出世到𠵱家，我都咁錫佢。」
