香港唔算大，但講到打扮，原來不同區都會有各自的「地方特色」。就睇三大蒲區，原來衣着主題都大大不同，旺角的Punk不會在尖嘴見到，尖嘴的㗎仔Look又難於在銅鑼灣覓得；銅鑼灣的斯文PinkLady，又罕見於旺角街頭，估不到在小小的香港社區，也有如此分野，難得是我們能接收全部形象，行出街怪怪又何妨，覺得有型最重要！
記者：梁佩芬、招佩珊
攝影：梁細權、陳陶鈞、黃子偉
日本Punk牌SexPotRevenge，最受旺角Punk友歡迎，可惜玩PunkLook者不少是雙失青年，怎買得起千幾蚊件衫？要玩嘢要型要突出，終極方法，就係DIY。這幾位對DIY甚有興趣的青年人，異口同聲話：「冇工開，冇學返，都要去街，唔通成個番薯咁咩，得閒無嘢做，拎番件舊衫，左剪右駁又一件新，阿媽見到咁慳都唔會話我着得癲！」
X-Japan嘅打扮，係旺角型人大熱模仿對象，誇張，妖豔。Punk味十足的《KERA》，就是他們的形象指南。
阿宴至In黑甲
三人當中18歲阿宴的玩嘢部份比較少，只係將件長袖衫剪成背心。反而我欣賞她指甲油上的一條直黑條，不是全隻指甲塗黑晒，因為「好Out啦！發癲嘅人先會咁搽！」另外，佢嘅手袋都用上好多廢物加工，好似拉鏈、扣針、㩒釘、線，做成不同圖案，需時只是一個鐘。
Yen身上的裙是專登買一塊約$100嘅紅色格仔布製造的，若喺舖頭買，至少都要$300；絲襪本是無窿全新的，穿上腳後，用錐仔篤吓篤吓，就做成甚有Punk味的Sexy絲襪；再加上喺條舊褲上拆出來的銀鏈，加一個鎖，又變成SexPot的飾物。
阿冷身上最搶係呢件寫上NoFuture的衫，「無工開又無學返，根本就無將來，費事成日俾人話無前途，不如寫上身，話晒畀所有人知，我係NoFuture！」眼看她還有心機為出街而打扮一番，至少對未來還有希望，加油吧！
去到另一個蒲點銅鑼灣，這邊的打扮較斯文，但就一樣有個性，這個夏天，一街PinkLady！無論是一個Tone，或只是襯衫、波鞋、或髮夾，男女老幼都愛掛粉紅色上身，再細緻分析，他們都愛以黑色襯粉紅，歸根究柢，個個都話：「黑色搭上任何一種色都OK，與粉紅一深一淺，比較順眼！」
原宿扮嘢PinkLady。問銅鑼灣女仔最愛參考邊本雜誌，答案不是《Zipper》、《Vita》就是《Cutie》同《Fruits》，加上這裏很多舖頭都賣仿日本Fashion時裝，價錢平，選擇多。
從無諗過一個價值兩蚊的口罩可以襯衫，更可為這不平凡的日子添上點生氣。星期天，去銅鑼灣Shopping的Ellen，一條連身粉紅色裙，配同色口罩，再加上身上近十件的粉紅物品，是那麼多PinkLady中，最花心思的一個。
單是一條加連威老道，又是日本Look天下，無他，打扮指南都係嗰幾本大熱日本雜誌，況且，連附近的型人買衫點利時，都一直勁煲東瀛潮。不過，雖說全香港都玩㗎Look，尖沙嘴型人都自有模仿對象。眼見個個留小鬍子、戴耳環、心口掛條大頸鏈，有齊3大特點，重唔係抄降谷建志？
降谷建志係日本樂隊DragonAsh主音，也是東瀛潮流Icon，本本雜誌都以他作打扮指南，唔少日本仔亦跟到足。
從事設計的Chris，鞋、褲同頸鏈都是尖嘴貨，問他一身打扮要幾銀，他不是忘記了，便說是朋友送，記得的就有只需$69的人字拖一對。留了小鬍子的Chris，若然加埋條頭巾，說他是降谷建志都有人信。