古天樂噚日由塞班島坐咗一個鐘船去天寧島拍唱片封面相，一行人行咗成半個鐘嘅崎嶇山路先可以去到懸崖邊取景，古仔重一支箭咁走到去崖邊，重諗住擺定個有型甫士影相。點知一個大浪冚過嚟，令古仔成身濕晒，佢着住嗰件白色衫即時變咗透視裝。
不過，幫古仔拍唱片封面嘅攝影師影相嗰陣，因為俾另一個好大嘅浪冚過嚟，搞到成個人失咗重心，跌咗落地下，古仔見到即刻埋去扶起個攝影師。噚日古仔話：「見到個攝影師手腳同個肚都俾岩石𠝹損晒，我就決定先同個攝影師返酒店療傷先，最初諗住崖邊影浪花會好靚，都唔知會搞成咁。」
記者魯萍塞班直擊
噚日梁詠琪（GiGi）去咗港台接受訪問，佢話呢排好得閒，本來今個月預咗宣傳電影《向左走．向右走》，但因為非典型肺炎問題影響，套戲要延遲到暑假先至上。GiGi話：「所以我呢排多咗時間喺屋企寫歌，下一隻碟應該有半隻都係我自己作嘅歌。」
郭富城近排簽約成為Clarins護膚品的首位形象大使，今個星期日重會喺銅鑼灣舉行一個記者會，一向對做善事不遺餘力嘅城城，要求廣告商撥出部份產品用嚟做慈善義賣，將收益捐畀抗非典型肺炎嘅「茁壯行動」，城城重話：「我好幸運，我所代言嘅廣告商都好支持我，令我可以將工作寓慈善，回饋社會。」
蘇永康同吳國敬前晚喺新城接受訪問，提到吳國敬下個月舉行嘅演唱會，被傳只係賣得三分一門票，阿敬前晚話：「𠵱家平飛賣晒，貴飛都去緊。」提到許志安同新人鄧肇欣嘅緋聞，康仔話：「個女仔都唔係許志安鍾意嗰類。」而阿敬就話：「係囉，同埋佢𠵱家想溫馨呀，鍾意家庭。」
汪明荃（阿姐）噚日喺銅鑼灣一間排舞室綵排演唱會，原來阿姐會好似劉德華一樣，喺演唱會表演拉丁舞，佢重請咗台灣老師周志坤做佢拍檔，只見阿姐俾周老師拋上拋落，又擘髀又倒轉咁，認真精采。
阿姐之前捐咗以前做舞台劇嘅旗袍義賣，有歌迷以二萬蚊買咗後又將件衫送番畀阿姐，而筆錢會捐畀護幼教育基金。
田蕊妮噚日喺亞視綵排台慶，最近杜汶澤買咗兩個車牌，其中一個送畀女友田蕊妮，不過佢就唔係咁鍾意，佢話：「我哋本身已經有一對車牌，但係就冇特別意思，佢早排突然同我講話投咗個HK1999送畀我，話嗰年係我哋拍拖年份，之後佢投埋XX1999，後尾俾我發現兩個牌要成九萬幾，激死我。」
梁漢文噚日喺商台做訪問，佢話早幾日發燒、發冷重肚屙，十足十非典型肺炎嘅病徵，嚇到佢半死，梁漢文話：「不過我喺屋企食咗粒藥，着咗幾件衫，焗咗一身汗冇咁燒，但就不斷屙，所以我頂唔順去咗睇醫生，不過醫生話我只係腸胃炎。」
