梳打埠今日起提供埋芬蘭超聯嘅盤口，不過北歐足球對於我哋嚟講都幾陌生；再加上今日有連場聯賽進行嘅同時，芬蘭國家隊又有一場作客對挪威嘅國際友誼賽噃，照計隊國家隊應該難全力以赴，真係要吼實對家上盤嘞。
我求大俠就真係少接觸北歐嗰邊啲足球，好難理解佢哋點解喺一輪聯賽進行嘅時候，都重要應付國際賽！𠵱家科素、列馬倫、泰尼奧等芬蘭主將，都重未喺所屬嘅國外球會收「咧」，呢場肯定無份踢。國內嗰班又要踢聯賽，究竟芬蘭今晚對挪威有幾多料呢？
畀個幾好提議大家，就係先去浸番個芬蘭浴，度番場芬蘭超級聯賽靚纜，跟住玩埋挪威對芬蘭場友賽，實行唔使搭飛機，都可以過一個「芬蘭之夜」啦！
前晚羅馬大敗予半力出戰嘅AC，教練卡比路埋怨佢哋今季受到傷病同埋成日因為球證誤判而影響戰績。我求大俠睇唔到場波，但佢哋防線十分鐘失三球就實有問題。再講，唔少羅馬球員今季長期夢遊球場，卡比路將責任推晒去運氣同球證，無乜頂級教練應有風範喎。
講開AC，前日佢哋贏得咁清脆，據講翼鋒沙真奴同埋龍門艾比亞迪都有超水準演出。咁就弊嘞，佢兩個咁勇，教練安察洛堤下個禮拜歐冠盃決賽對祖記時，都唔知用唔用佢兩個好。AC軍力咁雄厚，去到季尾班波無咩傷病，真係恨死隔籬。
保加利亞中場堅斯舒夫突然宣布退出國際賽，其中理由係唔服隊長臂章落喺些路迪中場柏杜夫手上。廿八歲嘅堅斯舒夫代表國家隊資歷比二十三歲嘅柏杜夫深，唔忿氣都唔難理解。不過隊長呢家嘢未必計年資，而國家隊下個月要火併比利時，堅斯舒夫無顧全大局，抵鬧。
最有機會成為今年NBA選秀狀元同榜眼嘅年輕新星勒邦占士與安東尼，好多體育用品公司都好想收歸麾下，Nike同Adidas、Reebok為勒邦占士角力之際，噚日就宣布已經同安東尼簽約六年，但未有透露合約內容；Nike呢招都幾醒目，起碼就算喺爭勒邦占士一仗最終輸鬼咗，咁冇咗個橙都有番個桔吖。
據報話基維爾唔肯過檔曼聯，係知道自己過去未必有正選踢、薪酬待遇又麻麻；另外佢又唔滿意某啲英國報章，睇死佢一定仆到去曼聯，所以寧願留多喺列斯一季。都好嘅，話晒佢下季同列斯約滿就可以免費轉會，到時同人傾薪酬就多咗籌碼。