美股周二晚其實有機會反彈，但俾「一隻橙」及「一隻牛」破壞，杜指中段最多跌過77點，低見8416，尾市拗腰成功，僅跌兩點，收8491。杜指日線圖由陰燭變回十字星，周三走勢十分關鍵。
市場觀望格老周三晚講話，以及放風話業績好靚嘅惠普，究竟實際業績靚成點？杜指期指偏軟，港股走勢十分牛皮，恒指收9059，升9點。倉內恒指Put輪9698，低位見過0.139元，高位見過1.51元，最後則平收0.145元。好淡決戰遲遲未展開，趙飛雲其實等到好悶，但既然睇唔通，一動不如一靜，繼續持有等運到。
炒股其實相當講耐性，倉內另一隻海域（1220）終於發力，噚日大升4.5%，收1.39元，唔怕眾人坐車我行路，但最失敗係決而不行，早前冇在1.30元破位時加注。海域經昨日大升，技術走勢確認轉強，不但升破長方形頂部1.38元阻力，MACD亦開始呈現雙牛訊號，短期只要守穩1.38元收市，首個目標上試1.48元。
海域短期炒作理由充足，可以炒派息及炒分拆。派息理想，基金捧場客可以有交代，繼續捧場。
海域分拆海域化工，海域股東每200股送1份海域化工優先認股權，記住只係認股權並非送股，而且係200股才送1股，如此安排究竟為誰及目的為何？相信聰明的讀者亦不用多解釋，總之呢系股票不妨睇多兩眼，唯一風險是分拆出現阻滯，但機會好微。