港股窄幅波動，恒指高低波幅65點，最低9020，係都守住九千大關。估計短期內喺九千邊邊做好友，風險唔大，贏錢機會高。
可以開始諗吓收集啲恒指Call輪，大把選擇，交投最旺嘅窩輪，頭8隻都係恒指輪，有Call有Put。短線買入對象有9723、9750、9784等。9723溢價最低，心理上最抵買。
中石油（857）升3仙，收1.83元，呢隻「股神」油股唔係點理油價走勢，純粹由芬佬睇場。芬佬揸重，經常要維持秩序，所以有時忽然跌低幾個位，好快又爬番起身，有隻中石油Call輪可投機，就係9381，吼住正股回軟時買。
9381今年7月夠鐘，現價5.5仙，溢價1.4%，槓桿率33.3倍，呢隻輪槓桿率夠勁，上落會好刺激。
地產股轉穩，恒地（012）企定喺19.50元，估計再有大跌風險有限，諗吓Call輪9787，隻輪現價17.3仙，溢價15.9%，槓桿率11.3倍，溢價唔得吸引，但明年2月先至夠鐘，壽命夠長，溢價高啲冇乜問題。電盈（008）較弱，收5.05元，跌3.8%，估計會守住5元大關。電盈Call輪昨日散晒，9662挫33%，9637唔見26%。兩隻輪溢價分別21%同48%，博反彈唔係唔可以，但最緊要快手快腳，咪長情。
章盛