性感小雲雀KylieMinogue自從同法國小生奧利華馬天尼斯（OlivierMartinez）拍拖之後，兩個人都未曾試過一齊出席公開場合，不過前日Kylie就同男友齊齊到蒙地卡羅出席有體壇奧斯卡之稱嘅勞倫斯體育大獎，着住性感紅裙嘅Kylie容光煥發，所以幾時都話，沐浴愛河嘅女人總係有樣睇！
自從奧利華同Kylie拍拖之後，畀人改咗個花名叫「Mr.Minogue」，不過自認係超級體育迷嘅奧利華，今次終於威番次，事關佢先至係俾人請做頒獎嘉賓嗰位，做女友嘅Kylie梗係要多多支持啦！有記者問Kylie愛情生活點樣，Kylie好開心咁話：「我同奧利華真係好到唔可以再好！我今次係嚟支持佢！」可謂晒命到不得了。
除咗Kylie一pair之外，阿諾舒華辛力加（ArnoldSchwarzenegger）同佢老婆亦由康城過嚟領取慈善獎項，認真畀面。