特首董建華啱啱喺立會答問大會上大鬧民主派「膚淺」，噚晚就輪到特首夫人發表「黐根」偉論，不過董太並非發火鬧人，只係好意提醒嶺南大學嘅畢業生要心懷母校。
嶺大噚晚假屯門黃金海岸搞畢業晚宴，校長陳坤耀、校董會主席梁振英身為主人家，請董太做嘉賓。可能睇到大學將來都要行自負盈虧之路，陳校長噚晚預先向畢業生動之以情，希望日後學生搵到錢，可以回饋學校。
董太及後上台頒獎畀傑出學生，致辭時佢話好同意陳校長嘅言論，話自己每次收到仔女學校寄來嘅籌款信，都提醒仔女要飲水思源，又曾提議過女婿為學校搞「BuddySystem（老友記計劃）」，聯絡得過獎學金嘅學生，要佢哋對學校有回報，「咁你條根就永遠、永遠同母校黐住！」唔係講笑，全篇講詞董太重複咗「永遠、永遠」四次。
噚晚董太好活躍，重同一班得獎學生傾密偈。不過當記者問到佢點睇特首喺答問大會鬧人「膚淺」，覺唔覺老公太躁時，董太卻只識笑唔識答，要旁邊公關人員幫佢解圍。
（圖）董太頒完獎狀畀班傑出學生，忽然攞出自備嘅開心笑面襟章四圍派。
黃冠華攝
傳真︰2623-9278
電郵︰