潮流興放假，可惜係冇薪水嗰種假，既然冇薪水，放假咁多，會唔會出外旅行呢？唉，又碰到沙士，香港人受外地歧視，去唔去都罷咯。不過國泰機票大贈送，東京機票最受歡迎，時裝鄭以前經常去日本辦貨，趁住消費一千蚊可換國泰來往東京機票，佢一口氣就換咗三張，而且上午換機票，下午上飛機，方便到極。餐廳羅趁住得閒到極，碰啱英國老友有車路士季票叫佢去睇車路士對利物浦，於是跳上架國泰七四七，直奔倫敦，佢打電話番嚟話：「全機只有四十人，國泰實蝕到喊！」
國泰已經取消唔少航班，啲機師好得閒，唔放假做乜？靚女K嘅老公係機師，以前老公成日飛，靚女K成日開夜，各有各忙，聚少離多，突然間沙士打到嚟，靚女K要放假放到心驚，𠵱家老公又要放假，兩人日日在家你望我、我望你，竟然唔習慣㖭，於是飛去澳洲再度蜜月，希望返嚟之後，沙士瘟神消失，否則好容易變成雙失夫妻也（夫妻齊失業）；放假本來係好事，估唔到𠵱家好多老友聞放假而色變！
小YY二月中去咗瑞士讀酒店管理，本來想暑假返香港入酒店做實習，現在希望成空，亦唔敢返嚟。佢傳來電郵，話瑞士學校要求疫區學生如果返鄉下放假，再上課之前就要隔離十日，唔預備返鄉下嘅疫區學生，要交出護照（防止虛報），可知瑞士人其實唔肯信人，視沙士為「黃禍」。