Tommy同Mark兩個男人，最近都識咗新女友，正密謀怎樣可以不用明目張膽，又不太猥瑣，就可以親近女友，兼搵到機會同女友過埋夜。Tommy仰望藍天，靈機一觸：「不如去沙灘！」身形健碩嘅Mark即時大讚有計，「至少都可以睇吓佢着泳衣，大飽眼福！」於是兩人打賭，睇睇邊個條橋最得，可以最快𠱁到女友去沙灘過埋夜。女孩子們都要了解一下醒少少。
記者：梁佩芬 攝影：林栢鈞、周旭文
Model：Tommy、Me（Kone)、Mark、Dominque（SO-BIZ.COM)
Mark的女友Dominque熱情奔放，逢夏天例必到沙灘躺上幾小時，誓要曬得一身古銅色先肯離開。Mark深明此理，又點會錯過一個可以摸勻佢全身嘅擦太陽油機會呢？於是就帶女友入最多明星出沒嘅南灣，南灣乾淨又人少，最啱自由自在曬太陽。
最啱邊樣女友：
1.最愛睇明星。陳豪、蔡一傑、何超儀等都愛出沒於此。
2.唔怕強勁太陽，唔怕曬黑。
Mark經過上次同女友擦太陽油咁溫馨，倆口子感情大增，係時候諗吓再進一步。今次就選擇南丫島模達灣，因為前往方法比較複雜，𠱁女友過夜都唔會太「揚」。
首先要喺香港仔碼頭搭前往「模達灣」小輪，班次稀疏，夜晚十點後就無船返出嚟。當然，最理想係搭下午四點船入去(鍾意游夜水，可選擇六點船，船程約半小時)，之後嬉水玩樂，再飽餐一頓，然後周圍行吓，鄉村小路尋幽探秘，其實志不在參觀，只着意帶佢遊花園，返回碼頭，不經意過了十點，無船走，就算行去索罟灣都要超過30分鐘，那邊的船也開了。這樣，又怎能錯過這個難忘的夜晚呢？
最啱邊樣女友：
1.對自己身材無信心嘅女仔。這裏乜人都無，佢都唔怕一Show身材。
2.可以出街過夜嘅女仔。如果佢係灰姑娘，無船出嚟，你就踢晒腳啦。
3.飲少少酒就HighHigh哋。兩杯落肚，鬆弛精神，做乜都爽啲！
Tommy出奇招，選了傳聞最猛鬼的石澳！話說六十年代，石澳常有走私船出沒，多是偷載香煙、火水及人蛇，這裏很大浪，走私的人以為風浪聲可以掩人耳目，卻不少人不幸被風浪奪去生命，偶然清早會有幾個衣衫不整的人躺在沙灘上曬太陽，但久久不動，最後才知道是遇難的屍體。
Tommy講鬼古嚇女友Me，怕開口昅着脷，將恐怖變為搞笑，所以早有準備，一早刨定本鬼古，更連鬼怪腳步聲同電風扇仔都準備好，鬼聲鬼腳步陰風都有齊，依計行事，未到最恐怖處，Me已經自動投懷送抱嚇餐飽！
石澳恐怖地帶
適合邊種女友：
1.膽小怕鬼。可能未講到最恐怖處已攬實你唔放。
2.鍾意聽你吹水。咁你就要先講吓自己嘅撞鬼經歷，先入正場喇！
3.怕曬見光死。呢啲女仔最鍾意夜晚入沙灘，玩吓踢水扮浪漫，營造吓氣氛！
經典鬼古：某晚，一對男女躺在沙灘上談心數星星，樹林那邊傳來一大班人的追逐聲音，突然一陣很重的腳步聲慢慢走近情侶，然後，停在女方那邊，忽然一陣陰風吹向她的髮尾，在微微月光下，看到有隻被水浸得發白嘅手伸過來，那「人」問：「你哋有冇火呀？我哋好凍呀，要取暖！」女的嚇至瑟縮在男友懷裏，男的看到這「人」一張起皺的爛面，沒有眼珠，鼻耳嘴都流着血，口還不斷吐白泡……