香港人同排隊真係結下不解緣，好景時排隊買樓，六四後排隊申請英國護照，97回歸後無啖好食要排隊搵工。
非典型肺炎自3月下旬爆發後，失業率急升係預料中事，但估唔到2-4月失業率高達7.8%，就業市場惡化得咁快，真係相當意外，由此看來，3-5月季度之失業率可能更高，而且尚未見頂。不過，港股早已消化呢個不利消息，上午曾跌破9000，但午後跌幅收窄，恒生指數收報9050，跌36點，成交62.33億元。
ICQ英哥話，香港勞動人口咁多，其實在港府118億元救市措施中，應該考慮聘請大量人手搞綠化搞美化，在兩年之內，將香港變成一個開滿紫荊花的花城，同時搞好旅遊設施及興建多些具特色的郊野公園，吸引更多遊客來港，一方面可解決短期失業問題，另方面助旅遊業復甦，好過搞其他無謂兼無用的宣傳推廣。
太平協和（438）公布同大股東汪世忠商談私有化，證明傳聞真係堅料，不過暫時唔知出手會有幾慷慨。阿虎對呢個消息覺得相當奇怪，因為汪世忠私人投資唔少，重要搞私有化，唔通真係錢太多冇出路？
講開私有化，最近南順香港（411）大股東大手向獨立第三者增持，唔知係咪為私有化進行鋪路？南順好少在市場集資，以南順的作風，如果上市無法集資，好大機會搞私有化。噚日復牌，成交稀疏，平收2.475元。
黛麗斯（333）噚日一度挫逾5%，跌至1.10元，嚇到阿虎以為大戶已經開始出貨，好彩重見有美資牌入市托住，以1.17元收市，冇起跌，總算有驚無險。
阿虎