內地疫情受控，噚日SARS新增17宗，照趨勢看來，好快會落到單位數字，預期人民生活將逐步回復正常，旅遊業概念股全面造好，近日推介的3隻重災股，中旅（308）、南方航空（1055）同首都機場（694）都逆流而上。
3隻股票嘅走勢都係頭肩底，中旅率先彈出，升破50日線（1.08元）同頭肩底頸線阻力，高收1.12元，升5仙，成交且倍增至2400萬股，動力轉強，以量度升幅計，上升目標係1.35元。中旅認股證763下月30日到期，行使價1.22元，中旅會否營造一個「收水」嘅環境，你話呢！另外，中旅明日除息4仙，好大機會財息兼收。首機收1.69元，升3仙，50日線1.68元，亦破位而上。
南航收1.82元，升3仙，暫時仍受制50日線（1.84元）阻力，噚日成交亦倍增，相信好快會突破，短線目標2.2元。為降低SARS對航空公司的衝擊，內地部門已降低起降費和航路費，近日再降低旅客服務費，而航空公司為減輕負擔，正努力向各有關部門申請多項稅費減免。南航強勢，主要係有基金收集，佢哋唔係睇短線，而係看好其前景，家下疫情受控，基金收集之勢或會轉急，若破1.84元可追進，預期有兩成利潤。
中國製藥（1093）業績果然對辦，今年首季營業額6.36億元，升86%，獲利1.54億元，升幅近兩倍，每股盈利10.24仙。青霉素和維生素C係盈利增長的主要來源，前者產量1249噸，升42%；後者產量3502噸，升9%。以首季業績估計，全年盈利預測可調高至5.5億元，每股盈利38仙，PE8倍計，持有半年，目標價可見3.0元。維生素C需求強勁，中藥上月已動工興建一條新生產線，產能1.5萬噸，明年初投產後，集團維生素C產能將大增1倍至3萬噸，盈利可保持高增長。
新世界系全面發威，新創建（659）升幅最勁，高收2.6元，升破2.525元阻力，走勢再現突破，且有大成交支持，短線可向3.4元目標推進。另外，自然美（157）噚日有異動，成交係3個月來高紀錄，可留意，升破0.56元，目標指向2月底高位0.72元。
郭兆誠