外商因非典型肺炎唔敢嚟香港發展，搞到寫字樓租務需求大減，租金有乜辦法唔跌呢。蘭西聽業內人士講，上環有啲寫字樓，全包月租都係五蚊呎，扣埋管理費就只係兩個零，而且重有免租期㖭。
原來呢啲咁平租嘅寫字樓，主要係由散業主持有，內櫳裝修唔係咁好，業主為可以快啲租出單位，幾乎乜嘢條款都肯制，好過丟空，白交差餉管理費吖。租客就算計埋執吓單位嘅使費，都有着數。
但同人唔同命，原來灣仔區有啲寫字樓租金好硬淨，唔係跌好多，好似集成中心咁，呎租企穩喺九蚊呎。聽講原因係呢啲商廈位置好，同埋由單一業主持有，管理好啲，租客較有信心。喺家陣寫字樓供應過剩嘅環境下，能夠吸引到租客承接已經好好，集成呢啲例子真係唔多。
金豐易居‧鴻運國際近排落力推銷長實畢架山一號，重喺灣仔合和中心分行，撥咗個位作展銷廳。由於位置有限布局都以簡單為主，有梳化、枱等簡單設備，主要都係憑牆上兩塊紙板同枱上嘅樓書，知道佢係宣傳畢山。不過牆上面嗰兩塊紙板就認真「唔生性」，開幕儀式途中相繼跌落嚟，好在幾位嘉賓無「中頭獎」，繼續談笑風生，百無禁忌。發展商重話，希望其他代理行都設展銷廳，相信吸取今次經驗後，下次會做得更好。
房協總監（物業管理）黃傑龍話，集團物業管理總部，旗下大坑勵德邨同青衣宏福花園管業處，最近一齊攞到香港品質保證局頒發嘅ISO14001證書，即係確認佢哋提交嘅管理系統，同提供服務達到國際環保標準。
ISO14001係針對環境管理，包括節約能源、減少用水同用紙量，增加廢物回收等。原來房協內部重訂咗個目標，就係要將能源、用水同用紙量，比標準再慳多5至10%，廢物回收就加多啲。
物業管理公司攞到呢類證書愈多，對屋苑或環保等都有好處，值得鼓勵。
出名風趣鬼馬嘅恒基張炳強，原來嗜好係睇書，重成日買書。究竟佢鍾意睇邊類書呢？就係關於戰爭嘅。佢話近排又入咗唔少貨，例如本《1759》，內容講英法大戰，本《1812》，就講美國同英國喺北美洲戰爭嘅歷史。除戰爭歷史之外，對於交戰雙方策略嘅書籍梗係唔會放過啦，佢話唔多唔少都有將呢啲兵法用喺賣樓方面。
新地用千七萬起嘅青衣自然教育徑，最近建成啟用，全長4公里，以寮肚路為起點，環繞青衣島西北面山嶺而建。沿途種咗好多植物，重有千二呎長嘅扶手欄杆同兩座涼亭，認真體貼行山人士，管理方面會畀番政府負責。𠵱家發展商喺起樓之餘，重搞埋社區設施嘅例子愈嚟愈多，之前有新地喺旺角起嘅行人天橋，同喺港大學旁起嘅行人電梯。另外長實天水圍嘉湖山莊包圍住嘅天水圍公園，都係由發展商出錢興建，然後交畀政府管理。
蘭西
電郵地址：
