平凡不過的窩蛋牛飯，對Shirley來說卻是最窩心的佳餚。事關這是Shirley母親吳媽媽的拿手好戲，一煲飯養大了Shirley八姊弟妹之餘，去年Shirley生完第一胎坐月時，竟也是靠這窩蛋牛飯調理身子。「鄉下興生完仔要食番啖飯先有氣力同營養。」吳媽媽肯定說。又是同一煲飯，上過電視台、參加過比賽，令平凡的菜式盡顯不平凡。
記者：吳佩璇攝影：陳智良
小時候，Shirley記得每逢星期日，媽咪就會晨早煲定一大煲窩蛋牛飯，然後才上班去。事關八姊弟妹，有的會趁禮拜瞓到黃朝白晏，窩蛋牛飯連餸連飯，㩒個電飯煲掣就搞掂，方便他們幾姊弟妹翻熱吃。Shirley笑說：「嗰陣邊個包尾起身就要齋食白飯，因為啲牛肉畀早起身食飯嘅𢳂晒！」
去年年底，Shirley生完仔仔James之後，65歲的吳媽媽為了讓女兒盡快恢復體力，朝朝五點起床，準時七點就將窩蛋牛飯親送到Shirley屋企。Shirley感激的說：「嗰陣得七、八度，媽咪都風雨不改咁送飯畀我，等我一早起身唔使空肚餵人奶。成個人真係精神好多！」而且吳媽媽特意加入薑汁，又不辭勞苦的改用砂煲煲飯，足足維持了個多月！
雖然Shirley屋企跟媽咪只五條街之隔，但吳媽媽於98年遇上交通意外，右腳釀入鋼片，不宜久站操勞，但仍堅持送飯：「我呢個女同我住得近最着數，其他嗰啲生仔時想送飯都唔得！」
為了報答吳媽媽的一番心意，Shirley在今年的母親節，參加了一個讚頌母親的烹飪比賽，菜式當然就是窩蛋牛飯，而這個飯亦成了十名入圍菜式之一。雖未能摘冠，但吳媽媽已猛話感動！
Shirley坐月時，吳媽媽為使飯味更香，改用砂煲煲飯。但係人都知砂煲好易煲燶飯，一定要打足精神昅住火候。吳媽媽教路，要待飯煲至七、八成熟，才將牛肉等材料放下。吳媽媽還細心的將薑剁爛後，以手揸薑汁來加入飯中。即使不是坐月，食落都會醒胃兼驅寒。
有咩料：
碎牛肉 3両
蛋 1-2隻
葱粒 少許
調味：
生粉 1茶匙
薑汁 1湯匙
生抽 半茶匙
熟油 半湯匙
粟米油 半茶匙
凡是咖喱食物，都是吳媽媽最愛。但偏偏吳媽媽患有糖尿，不宜吃得那麼刺激。為了報答媽咪，Shirley就自調咖喱汁的濃度：用半罐咖喱汁開一罐椰汁來煮，令入口更香滑，又有少許咖喱味。喜愛辣的朋友，可照依以下做法，但就落足一罐咖喱汁來煮。
用咩料：
雞髀3隻、薯仔2個（切細件）、紅蘿蔔1大個（切細件）、咖喱汁半罐、椰漿1罐、洋葱少許、薑片少許
調味： 粟米油1湯匙、生抽1湯匙、生粉2茶匙
家住堅尼地城附近的Shirley及吳媽媽，推介士美非路街巿。吳媽媽更總結幾十年買餸心得話：「呢個街巿算得上好有規模。皆因食物種類齊全，樣樣有之餘質素又有保證。」不少上環、石塘嘴、甚或香港仔的人，都會專誠來這裏買餸。