自從新世界發展（017）被剔出恒指成份股之後，證券界同埋融資界開始關注集團的減債大計。
年輕賓架話，魚缸流傳，話新世界系內的非核心資產會陸續沽出套現。其中新世界數碼（276），亦係其中一個沽出對象。
小初聽完，終於恍然大悟，明白新數碼點解自踏入5月以來，股價由0.02元樓下反彈，兼且成日搭晒棚，原來係有人想借賣盤消息炒作。連升多日的新數碼，噚日終於略見回吐，跌3%，收0.031元。
年輕賓架又話，據講新世界以及關連友好，持有唔少上市公司股份，好似先一排至成功甩咗隻天網（577）。至於新數碼，在科網股火紅年代亦曾經威過，亦成功抽過唔少水，但全部都成為往事。
雖然新數碼話就話放盤，但融資界人士認為要斟新數碼並唔容易，皆因人哋話晒都係大孖沙，條件一啲唔易傾。
慕容小初