美股期貨期權雙重結算後，好友似乎真係收晒手，美股周一晚大插水，杜指大跌185點，跌幅2.1%，收8493，納指更急跌3%，收1492。市場解釋美股下跌原因係因為美元弱勢及面對通縮風險，其實並非新聞，只係上周美股未到時候跌而已。
納指本來浮現牛蹤，但經周一大跌3%，相信要展開較大調整，才能重展升浪，納指跌穿20日線（現處1496）收市，將下試3月升軌1460水平，但同期9RSI升軌已率先跌穿，1460估計守不住，納指今次展開調整，相信起碼要跌近50日線（現處1420）才有較大支持。杜指走勢大致和納指相近，短期估計亦要考驗50日線（現處8310）支持。
美股確認展開調整，但昨日港股依然硬淨，恒指開市初段最多跌過114點，低見8973已經跌唔落，早市大部份時間在9020至9040窄幅橫行，午市進一步抽回9050收市，只跌36點。期指加時階段更挾至全日高位9069收市，高水19點。
港股應跌未跌，理由可能和美股相似，就係大戶好倉轉唔到身，要繼續力托。港股兩大藍籌滙豐（005）及中移動（941）動力開始轉弱，暫難作為升市火車頭，加上現時大市炒至三四線股，亦是大市升近尾聲，展開調整的先兆。大市不徇眾要求先下試8800-8900完成整固，可能啟示市底十分強，或係派貨未完。倉內恒指Put輪9698昨平收0.145元，溢價進一步縮至2.8%。牌面仍利先下試8800水平，繼續持有。
趙飛雲