新一代Mini自推出以來，一直成為車迷追捧車款，當中配用一台1.6公升偈及以手波配搭出現嘅MiniCooperS型號，更成為搶手貨㖭！同一時間，各大改裝公司亦紛紛推出適合新Mini嘅改裝部件，以迎合不同車迷口味；若然你都想為自己嘅Mini改裝的話，咁就不妨參考吓今日我哋特別為大家精心挑選嘅兩部改裝MiniCooper喇！
記者、攝影：李智佳
車輛提供：TWAutosport（21420001）
逢星期一至日刊出
市面上其實有好多能夠將Mini性能提升嘅高性能改裝部件，但並唔係每一件都適合香港路面環境使用，特別係行車電腦；故此，呢部激改MiniCooperS嘅車主，會為其作出適合香港天氣同道路環境嘅改裝。首先，車主會為座駕裝上一套增壓電腦及增壓輪，將生氣壓力增大，使馬力輸出可輕易達到210匹；而響香港呢種炎熱嘅天氣下，呢類改裝更能保持生氣嘅溫度，並特別調校至適合香港天氣使用，直接對應Turbo車響香港行駛時嘅弱點。
論賣相，原裝MiniCooperS已經夠晒煞食，但車主仍為其加裝一套由Hamann提供嘅全車包圍，襯以一套Volk-Racing17吋跑車合金胎軨，一份高性能跑車韻味油然而生；車廂內亦裝有Hamann嘅波棍的、手掣桿及跑車腳踏，除好有吸引力外，車主更特別搵來Defi嘅油溫及增壓表，並安裝於車廂杯架上，手工之佳重會令人誤會係原車裝備之一呢！
另外，車主更為呢部MiniCooperS加裝一種新推出嘅碳纖維風鼓，佢能夠有效阻隔引擎艙熱力對生氣嘅影響；而呢套高性能風鼓，除能增強吸風量外，響高溫時碳纖維部件亦唔會令生氣熱力大增，有助保持引擎正常運作。就連火嘴亦改用上Denso銥合金火嘴，呢套火嘴嘅特幼專利火嘴頭設計，能使電流更集中，從而增強引擎反應及頭段輸出。
原有MiniCooperS嘅操控表現已非常了得，但車主仍稍嫌操控方面過於被動，所以就為其換上KW嘅V2可調式懸掛系統；呢套懸掛可以人手調校，並可在任何路面環境上操作，亦比固定式油壓吸震筒反應更加快㖭！排氣系統亦改換上Supersprint排氣鼓及中至尾喉，不但予人沉實嘅排氣聲外，而且重可以令引擎呼吸變得更暢順呢！
德國車改裝專家Tony表示，由於新一代Mini改裝彈性非常大，而當中嘅CooperS型號更可應車主要求而調校至相當跑得，但其他改裝配搭則可令新Mini有斯文嘅一面；然而，一般日常多在街上行走嘅Mini，會被調校得較為中性，不但以行車舒適性為主，同時亦能讓你感受到嗰份有如高性能跑車一樣嘅操控感。
若然唔想將你部MiniCooper變成跑車的話，不妨參考吓呢部加有全車包圍嘅MiniCooper吖！呢套包圍望落好有ClassicFeel之餘，再襯埋一套MS嘅18吋胎軨，單係賣相經已惹來不少街上途人嘅注意。另外，車主為增強車子嘅制動性能，故特別為其加裝一套Brembo專為新Mini而設嘅四活塞卡鉗制動器連煞車碟套裝；呢套制動系統主要係將重量降低外，制動碟亦改為浮動式設計，再配以特別設計嘅四活塞制動卡鉗，從而令制動表現更見突出。而今回裝響呢部MiniCooper身上嘅Brembo制動器，車主更指定用上與車身同色嘅制動卡鉗，代理方面更特別將車身顏色傳送予Brembo，響佢哋生產時直接噴油，耐用程度毋庸置疑。