美股散得唔細，但港股只係跌36點，多得沙士疫情進一步受到控制。
和黃（013）第3日下跌，收45.10元，唔見40仙，若然見再落到44元邊邊，不妨收啲Call輪博反彈，穩陣嘅對象係9811（為封頂輪，封頂價50元），搏殺嘅對象係9666。9666交投量大，時日無多，1個月後夠鐘，現價8.3仙，溢價7.2%，槓桿率54.4倍。要留意隻輪係價外輪，行使價47.50元，正股𠵱家45.10元，最後升唔夠2.40元，隻輪就冇晒價值，所以博呢隻輪切記咪揸得太耐，否則輸溢價輸到喊。
美國股神新歡中石油（857）與中石化（386）同進1仙，石油股走勢反覆，跌落去上得番，但又唔容易有強勁升勢，可留意當佢哋回落時，趁低買啲相關Call輪，中石油Call輪9232，11月到期，現價23.9仙，負溢價1.4%，槓桿率7.5倍。
中石化Call輪揀9227，年底到期，現價19.4仙，負溢價0.3%，槓桿率7.7倍，隻輪最大問題係交投好多時一片空白。
裕元工業（551）批股後生生性性，思捷環球（330）批股後亦反覆好番，昨日回落到14.80元，呢啲基金股唔會直插，到咁上下又會有人維持秩序，吼低買思捷Call輪9613，11月到期，現價21.4仙，溢價8.2%，槓桿率6.9倍。
章盛