啱啱搞咗個名人高球賽嘅米高德格拉斯（MichaelDouglas），前日又返去荷李活出席佢部新片《In-Laws》嘅首映禮，而生完女冇耐嘅嘉芙蓮薛達鍾絲（CatherineZeta-Jones）自然亦做跟得夫人，不過低胸打扮嘅佢，似乎重未收晒身噃。
大家提起米高同嘉芙蓮兩夫婦，都會覺得佢哋鍾意出風頭兼睇人唔起，不過最近佢哋都做番件好事，話說米高同嘉芙蓮答應喺拉斯維加斯舉行嘅慈善拍賣入面，邀請出最高價嘅競投者去佢哋嘅豪宅消遣，結果兩對出價九萬英鎊（約一百一十四萬港元）競投拍賣品嘅夫婦，將會喺唔同嘅周末去到百慕達同米高夫婦一齊食飯飲酒。但係咪話我心地唔好呀，佢哋不嬲都怕俾人揭私隱，唔知今次會出乜嘢手段叫嗰兩對夫婦守口如瓶呢？
而喺首映禮入面，除咗有近排冇乜搞作、啱啱參加完高球賽嘅史泰龍（SylvesterStallone）同佢老婆現身之外，一對喺電視節目《EntertainmentTonight》入面贏咗比賽嘅新人，亦有幸喺首映入面舉行婚禮，有成班大明星做嘉賓！