英超聯球季結束，轉會消息開始滿天飛，其中最似又可最快成事嘅一單，應該係英格蘭嘅中場保耶加盟紐卡素，因為紐記領隊卜比笠臣一向鍾意有潛質嘅年輕球員，而且保耶係免費轉會㖭，雖然周薪就貴咗啲，要成四萬鎊（約四十八萬港元），但起碼紐記都慳番一筆轉會費，除笨有精。
不過，保耶出咗名紀律一向唔好，加埋紐記本身一班唔定性嘅年輕球員好似戴亞、活基治、班納同埋比拿美等，紐記可以話係「壞仔兵團」；佢哋雖然好有質素，但要管得掂佢哋一啲都唔易，莫非卜比笠臣對自己嘅治軍方法真係咁有信心？
話時話，𠵱家吹水轉會新聞嘅愈嚟愈多，我求大俠就奉勸各位讀者都係抱懷疑態度睇呢啲新聞好啲，如果段段都當真，就真係好唔得閒！
講開轉會，剛降落英甲嘅韋斯咸中場杜利華洗佳亞，就話為表示對球會嘅忠誠，唔會要求轉會，重話有信心會助韋斯咸打番上英超聯㖭！雖然杜利華冼佳亞嘅高尚情操的確令人尊敬；不過佢已經三十歲，若果想留喺國家隊，唔效力超聯球會始終差啲噃！
阿仙奴奪得英格蘭足總盃本來值得慶祝，但最近竟然傳出球會冇錢搞慶祝，要領隊雲格自己掏腰包，咁就認真那個。雖然，「兵工廠」嘅高層最後都攞咗一萬鎊（約十二萬港元）出嚟，不過乜慶祝氣氛都俾佢哋搞喎啦，唔通「兵工廠」因為要起新球場，真係搞到咁莫財？
繼前拜仁同德國中場艾芬保喺上個禮拜以年薪二百萬歐元簽卡塔爾球會艾沙德一年後，曾經同艾芬保做過隊友嘅巴士拿喺前日，亦以一樣嘅人工簽咗卡塔爾球會，艾拉恩。艾芬保同巴士拿都接近三十五歲，但大賽經驗豐富，佢哋應該可以幫助提高卡塔爾足球嘅水平。
今屆俾多蒙特借去升班馬漢諾威、重成功鹹魚翻生嘅波碧，下屆會過檔強隊哈化。或者有人覺得波碧咁做好冇義氣，但佢幫咗漢諾威留喺德甲聯，功成身退。佢𠵱家喺德國國家隊都幾受到重用，且重當打，所謂人望高處，佢咁做真係無可厚非。
NBA近期傳緊，木狼稍後會同公牛商討出讓佢哋隊中大前鋒加尼特嘅可能性，如果係真，呢宗交易都幾轟動。睇番加尼特同木狼合約重有一年屆滿，如果木狼要續約就要付出「沉重」代價，加上木狼連續七季都喺季後賽首圈止步，球隊真係出讓佢都唔奇；不過呢位聯盟其一最出色大前鋒係咪終要淪落到去公牛呀？