八月疫情未卜都要唱
馮仁昭四圍超：張信哲率八歌手紅館開騷

非典型肺炎肆虐，搞到啲台灣藝人唔敢嚟香港，費事返台灣時要被隔離十日，不過有班台灣歌手就好勇，唔怕俾人隔離都要做過江龍，喺八月拉隊嚟香港紅館開演唱會。

創下淡市奇迹
劉德華取消咗原定喺八月舉行嘅演唱會，佢個紅館檔期就讓咗畀張信哲、張宇、辛曉琪、趙傳、順子、黃品源同陳昇等九位台灣歌手，之所以咁多寶島歌手會嚟香港開演唱會，係因為早排華納推出嘅國語精選碟《愛情蒲公英》大賣，近日呢張碟嘅銷量已經去到十八萬張，喺𠵱家呢個淡市嚟講，簡直係一個奇迹，所以「恆藝亞洲娛樂」就決定搵番喺碟中有份主唱嘅台灣歌手來港開騷。

舉行視像記招
呢個演唱會暫名叫「再見蒲公英」，會喺八月八至九日連開兩場，下個月十五日就舉行記者會公布詳情，如果到時台灣重有隔離政策，主辦單位就可能要舉行視像記者會，希望到咗八月嘅時候，SARS疫潮已經退咗。

胡杏兒駁髮搞足半日
應屆港姐林敏俐未卸任已經工作多籮籮，佢接拍咗無綫新劇《追魂交易》，重係擔正做女主角，噚日劇中演員胡杏兒同王喜等喺將軍澳電視廣播城試造型，胡杏兒頭上嘅駁髮足足整咗十一個鐘，難怪佢話：「今次真係為藝術而犧牲，但靚都有代價，我𠵱家一定要打側瞓覺，唔係會整亂個頭。」

陳奕迅最想去「老妖」
陳奕迅（Eason）噚日去咗銅鑼灣行街買嘢，響應多啲消費同帶動香港經濟，使咗差唔多千一蚊。其後Eason走去中環機鐵站嘅國泰櫃位買機票，佢揀咗八百蚊嘅宿霧機票，然後話：「其實我想去『老妖』多啲。」成班人一頭霧水，原來Eason想去老沃，但因為佢唔識讀個沃字，所以搞錯咗。

志偉激賞抗炎醫生
曾志偉前晚代表演藝界人士相約沙田威爾斯醫院醫治非典型肺炎病患者嘅醫生見面，志偉大讚呢班醫護人員，佢話：「我覺得𠵱家SARS控制得好好，大家都同心合力，而且病人喺患病期間都互相認識，佢哋重做埋朋友㖭，呢次香港嘅醫護人員都好值得我哋嘅驕傲。」

徐熙媛見高踭鞋怕怕
徐熙媛噚日同台灣記者講，話因為自己太鍾意着高踭鞋，搞到有「椎間盤突出」呢個病，嚴重時雙腳會麻痹，所以見到高踭鞋都驚。徐熙媛又話喺雲南拍《倩女幽魂》嗰陣好慘，食同瞓都唔好，連沖涼都好麻煩，所以佢話自己返台灣之後推咗好多戲，因為想過啲悠閒嘅生活。