南山邨令你聯想起甚麼？大概只是一幢30多年的舊樓或「烈火雄心」吧！但當你去到南山邨，卻會發現一間與別不同的餐廳，遠看嘅格局好似法式Cafe，扇門開揚之餘門口又擺放了幾張餐桌，與附近的殘舊建築物相映成趣，可謂「萬綠叢中一點紅」。
記者：何善華
攝影：林栢鈞
不說不知，自從餐廳裝修後，除了有一批長期的熟客仔幫襯外，更吸引了大批來自城市大學的學生來光顧，王經理不諱言表示，當初有不少朋友勸阻他不要在舊屋邨內發展，但他深信城大學生是一個最大的市場。
「我喺度做過調查先決定投資，始終年輕人嘅消費能力最強，而且佢哋以前都有嚟南山邨嘅大牌檔幫襯，我唔相信佢哋只會鍾意喺學校Canteen食飯。」
這是一道王經理與總廚的「結晶品」，表層用上方包和芝麻為材料，用蝦膠將蝦隻包裹，肉質彈牙，咬落極為香口。
驟眼看以為是一碟袖珍型的盆菜，原來用木桶盛載的燜腩肉，單係賣相已經殺晒，蓮藕爽脆而腩肉夠腍，加上「隱形」於桶底的滑滑河粉，可作為開胃的餐前菜。
用七味粉（辣椒粉）醃製而成的南乳炸豬手，唔好以為炸過就一定好多油，入口後出奇地香脆兼唔油膩，再加上少許的辣粉味，特別醒胃。
王經理表示，至現時投資在餐廳已花了三百萬，但生意尚算不俗，他期望於半年後達收支平衡，況且食店每晚都有不少顧客要在店外排隊等候，更有不少顧客專程駕車來。
「每晚都見到一啲生面口嘅食客，佢哋都話係朋友介紹先入嚟呢間餐廳試吓。」
無可否認，就記者採訪當天亦發現餐廳對面嘅大牌檔無乜人幫襯，但王經理否認自己已壟斷南山邨的食肆生意，他相信食客是貪新鮮的，唔會只幫襯一間，最主要是能夠將人流帶來南山邨，令這裏更旺，這已經是大家之福了。
為了令顧客食得樂而忘返，王楚賢對餐廳內的設備和食物嘅要求都一絲不苟，門口採用開揚式的扇門設計，食客在遠處已可望見餐廳；當顧客對食物有不滿時，王經理堅持不會與食客爭吵，立即換上另一碟菜式，只是希望顧客幫襯時有好的享受，「開開心心咁食番餐」。
抗炎絕招：王經理表示餐廳一向注重衞生情況，即使現在疫情稍為紓緩，但他仍要求所有職員戴上口罩，門口的紅地氈和廚房亦會每天進行消毒，更備有高溫洗碗碟機，確保所有器皿的清潔。
品香樓中西風味餐廳
地址：九龍仔南山邨南豐樓2樓平台204-205室
電話：27788791
營業時間：6:45am-12:00pm