一場沙士，百業受害，連八方做嘅傳媒行業亦唔例外。上個禮拜發咗盈利警告、郭鶴年嘅《南華早報》，噚日就話因為沙士影響業績，公布咗一個自願減薪計劃。月薪七萬以上嘅員工暫時性嘅減薪一成；三萬至七萬嘅就減百分之五；三萬以下唔使減。另外，今年嘅年終花紅亦會取消。
呢個計劃會為期七個月，由六月開始到年底，之後會再檢討。八方問過《南早》嘅發言人，佢話同事有一個禮拜時間考慮，但佢強調唔係話唔肯減薪嘅同事，就會被裁走。
發言人又話，現時《南早》有一千四百人，受影響嘅同事總共有二百四十一人。至於減薪計劃可以慳到幾多錢，佢就話因為唔知幾多人參加，所以暫時未計到。不過，八方收到料知道，如果所有人接受，一年可以慳到三千萬。
八方聽聞，呢次減薪係因為沙士影響廣告收入同埋銷量，《南早》更開始出現蝕錢情況。上個禮拜佢哋話四月頭到今個月中，廣告收入跌咗三成。咁嘅環境，當然會有人事變動，財經版阿頭RayBashford噚日就唔肯接受減薪就馬上遞信辭職，而上個禮拜體育版同埋《星期日南早》都有一個編輯起身。
傳真︰2623-9278
電郵︰