陸羽為咗「沙士」打擊業務，封咗三樓，成為全港性新聞，澳洲悉尼嘅老友記亦聽到電台報道，可見陸羽幾巴閉。點知封咗幾日之後，二樓茶客多到爆瀉，熟客都冇位坐，於是前個星期，又立即重開三樓，恢復舊觀，已經遣散咗或者退休嘅部份老夥計，當然冇得「恢復」啦。
呢日在陸羽茶室，投資陸講到佢在怡和大廈簽下新租約，計埋免租期及各種優惠，佢覺得置地非常照顧舊租客，係好業主。
L公子就話置地有絕招留住啲舊租客嘅。譬如愛丁堡大廈部份樓面要改建為服務式住宅，租客如果要搬去其他大廈（譬如國金二期），置地就堅持租客將辦公室恢復原貌，所有間隔、地線、傢俬都要清楚按照承租前嘅圖則，逐一還原。呢筆還原價可以好杰㗎，令到搬遷成本好貴，但如果你肯搬過去遮打大廈、怡和大廈、交易廣場咯喎，一切有計，還原舊貌由置地自己搞掂，唔使你畀，再加免租期……一計條數，點會搬往其他大廈呀，梗係乖乖地重投置地懷抱。
投資陸聽到陰陰嘴笑，佢亦係因為上述理由而留番響怡和大廈嘅。當今寫字樓租金下跌，乃大勢所趨，差餉物業估價署預測未來幾年，新寫字樓供應量，大幅減少，但同時間，take-uprate（租客需求）亦大幅降低，所以租金易跌難升。好多人揸住個Wi-Fi電腦可以坐喺「星巴克」開工之時，公司租咁多地方做寫字樓，唔合邏輯啫。