民主黨呢輪同老董紮晒馬，前黨員大嚿陳偉業又同林瑞麟互片，真係十分精采。
喺噚日一個飯局當中，眾人討論緊林公公瑞麟點解會愈嚟愈出位之際，在座嘅羅致光忽然爆響口，話識咗Stephen（林之洋名）好耐，九七前佢去加拿大旅行，重住喺林瑞麟屋企。此語一出，連民主黨副主席李永達都當堂彈起身，話佢都係第一次聽到羅致光原來同Stephen咁熟，莫非羅致光係卧底，好似《無間道》中嘅梁朝偉同劉德華？
幸好羅致光補充一句，話自從林公公去咗特首辦之後，成個人都變晒，同以前唔同，咁就算啦。
SARS一役，民主黨最希望可以迫到政府成立獨立委員會調查，𠵱家唔成功，就想睇吓內會可否通過由立會去查，主席楊森目前最頭大嘅重有二十三條點搞，要唔要全體起身唔撈，甚至有人話要自焚，但係太激又唔知港人受唔受，真考人政治智慧。
傳真︰2623-9278
電郵︰