乖乖女激變惹火辣妹
馮仁昭四圍超：黃伊汶上巴士𠝹仔俾人剪

黃伊汶早幾日拍攝新歌《戒男》MV，今次佢一改形象，着bratop性感上陣，重露出臍環，一夜之間就由乖乖女變身做性感辣妹。

意識大膽
黃伊汶喺MV中，同十幾個戴住古靈精怪面具嘅男女舞蹈員大跳辣身舞，當中亦有啲比較挑逗嘅撫摸及自摸鏡頭，意識大膽。由於早排陳驊嗰首《莫扎特的煩惱》嘅MV，因為動作太大膽，俾Roadshow要求刪剪，至可以喺巴士上播映，所以Roadshow之後對所有MV都有嚴格要求，而黃伊汶所屬嘅環球唱片，噚日就透露黃伊汶嘅MV都要經過剪輯至出到街。

左擁右抱
黃伊汶噚日喺電話中話：「其實都係cut咗少少啫，因為啲歌詞有啲露骨，講個女仔失戀之後，出去大玩特玩，個女仔重同啲男仔左擁右抱。」黃伊汶今次嘅打扮係佢入行以嚟最性感嘅一次，佢初頭都覺得有少少尷尬，但佢見親外國嘅MV，啲歌手逢係勁歌熱舞都着好少衫，所以佢後來都接受到，唔再尷尬喎！

家燕媽媽義賣助SARS孤兒
薛家燕早前以佢嘅「家燕媽媽」Q版形象，推出咗一系列嘅咕𠱸同公仔，近日就同卓悅合作推出抗炎包。
家燕姐前日為抗炎包拍攝廣告，佢重會喺下個星期日去旺角卓悅分店，義賣「家燕媽媽」抗炎包，卓悅會將二十萬善款捐畀「茁壯行動」，幫助受SARS影響嘅孤兒。

四哥唔知王菲探霆鋒
謝賢（四哥）噚日現身赤鱲角機場，佢啱啱喺泰國打完高爾夫球返港。
四哥話：「我都去嗰邊打咗幾日波。」問佢點解霆鋒唔陪佢去？佢話：「佢喺雲南拍緊戲，有排都返唔到嚟。」
咁四哥知唔知王菲去咗雲南探霆鋒？佢即刻話：「唔知！」

小齊俾舊愛嫌冇安全感
任賢齊早排接受新城電台訪問，講吓戀愛經驗。小齊話佢以前啲女友都話佢係好男人，但係個個都埋怨佢太忙，冇時間拍拖，又冇安全感。
小齊最記得送初戀女友返屋企嗰陣，大家都依依不捨，最後一齊傾天光，小齊重偷偷錫咗初戀女友一啖㖭！