港股噚日低開高收，好友早市守住9000關，午市展開反彈，恒指幾乎收復全部失地，微跌5點，收9087。
滙豐（005）對於淡友而言，直情係「刀槍不入一大象」，噚日逆市升0.75元，收90元，足以彌補其他藍籌的跌幅。滙豐單天保至尊，另一隻「天」中移動（941）則下試16元後出現輕微反彈，收16.20元，仍跌2.1%。從好友角度睇，當然希望中移動試底成功，重展升浪，到時「雙天」在手，要贏易過借火。
趙飛雲噚日亦曾有過以上憂慮，想過將倉內恒指Put輪9698計數離場，但睇見外圍美股期指散咗，似乎印證上周五美股期貨期權雙重結算後，美股轉弱勢的推想，所以繼續持有恒指Put輪9698。恒指噚日跌5點，9698收0.145元，反而微跌1格，大市牛皮，玩輪輸時間值，認真唔着數。雖有信心港股先下試8800-8900尋底，但亦須提防美股期指跌勢係陷阱，所以要有心理準備，隨時反手改揸恒指Call輪9723。
股仔噚日突然變得好熱鬧，甚至可以用禾雀亂飛來形容，似係有熱錢流入炒作，可惜倉內隻海域（1220）如老僧入定，只係平收1.30元。
隔鄰老友叫留意泓鋒（2309），話隻股上市夠半年，幕後人將有動作跟尾。隻股噚日再升3.4%，收1.53元，再創新高。隻股近期累積升幅大，只適合鍾意刺激及好冒險人士，一般求穩陣的投資者都係睇戲好過。
趙飛雲