昨日無論大型或小型工業股都炒到火紅火綠，兼夾大部份有成交配合。小初好疑惑，究竟芬佬係咪真係餓得咁交關，見到稍為有業績支持，有多少股息派嘅工業股都吼，就算公司唔係發新股，而係大股東套現減持舊股都一樣照要。
經紀黃話，好似黛麗斯（333）上周明明係基金賣舊股，噚日仍勁升12.5%，收1.17元，股價再創新高。收市後，林麥集團（915）又係大股東配售舊股，配售價每股2.08元，較收市價2.175元折讓唔夠5%，據講亦好快有芬佬要晒，真係唔到你唔服。
小初問經紀黃，家陣重有邊隻股可以追得過？經紀黃話，萬威國際（167）可列入考慮，同樣係有業績支持及有股息可派，而且屬過往紀錄穩定的工業股，有芬佬垂青，係遲早嘅事。
萬威噚日升6.3%，收0.84元，12球成交股數中，有5球係非自動對盤，聽講又係有人要貨，可繼續留意。
慕容小初