英格蘭國家隊星期四就會喺杜拜同南非踢友賽，主隊原本已經選好晒人腳，但突然唔畀教練馬沙巴揸弗，理由竟然係因為佢選得太多本土球員，忽略喺歐洲搵食國腳，真係騎呢！
馬沙巴選咗二十四名球員，當中只有三個係效力歐洲球會，南非足總則認為，今次同英格蘭友賽有特別意義，因為可以透過電視直播，證明南非有能力辦二○一○年世盃決賽周咁話；所以希望徵召更多海外球員歸隊，等呢場將會有多個國家直播嘅友賽更具吸引力。最後就決定「雪」馬沙巴，由前教練蘇奴帶隊，足總就立即召回拉迪比同麥卡菲等九名海外球員。教練因為冇選最強陣容踢友賽，而被足總「雪」一場後又可以教番，我求大俠都係第一次聽，第三世界足球國家果然成日為球迷帶來「驚喜」！
施文會唔會離開阿仙奴好快揭盅，其中現任阿仙奴龍門教練威爾遜向傳媒爆料，話佢一定會走，重會投效曼城㖭。其實，威爾遜同施文份屬老友，但我求大俠就質疑點解佢會爆施文來季去向，唔通驚阿仙奴畀施文做龍門教練，自己無冇得撈，所以先至咁做？
英超球季結束後，李鐵同孫繼海都已經返祖家過暑假，前者就選擇係屋企靜心休息，而孫繼海就唔放過呢個空檔，同一間國內體育用品公司合作，做代言人宣傳旗下產品，重拍咗一輯宣傳廣告相片，實行搵錢至上！
好多波盤都好似跑馬咁閘前瘋狂落飛，好似前晚NBA網隊作客對活塞咁，由初盤到夜晚十二點幾都係讓一點五分，不過開波前一個鐘，啲飛就嚟料，重打到上去讓三分；最後網隊僅勝兩分，上盤變下盤，有冇人輸大錢就不得而知，不過跟風追捧網隊嘅波友就一殼眼淚囉。
湖人換血肯定係必然嘅事，聽聞金塊大前鋒侯活係湖人嘅其一屬意人選，但係侯活上季𢭃緊超過二千萬美元年薪，湖人就只係畀得起五百萬美元。侯活面前明顯係名或利任擇其一，因為轉投湖人攞冠軍指環機會真係大好多，魚與熊掌，侯活自己諗嘞！
早幾日NBA公布今年選秀候選人名單，當中有成三十一位國際球員咁多，破咗歷年紀錄，海外球員當中包括中國球員薛玉洋，之後中國傳媒又爆料話已經有六支NBA球隊接觸過呢位中國籃球員嘅經理人。不過同薛玉洋打過波嘅香港飛龍隊友就話佢經驗同體形都重爭啲，要打NBA真係重爭少少，你估咁易有第二個姚明咩！