雖然八方唔算貪慕虛榮，但係都鍾意去半島酒店食番個tea。沙士爆發後，酒店拍烏蠅，八方諗住半島一定會大減價，但佢哋始終企硬，只係加入一個三千三百蚊住兩晚嘅優惠。但呢個堅持要付出代價，半島主席米高嘉道理噚日講，曾經有一日，擁有三百幾間房嘅半島酒店，只得九個住客，你都咪話唔慘情。不過如果從住客角度諗，超過一百個員工服侍九個客，簡直係皇帝式享受。
雖然大部份酒店入住率跌至新低，但凡事都有例外。
八方早前同香港小輪董事總經理何志盛傾起，佢話旗下位於梅窩嘅銀鑛灣酒店同往年一樣，復活節期間錄得百分百入住率，而且餐飲生意比起舊年重升咗兩成。有此佳績，當然係同沙士活躍市區、港人湧往離島有關。但佢話旅遊部門就慘，中國遊生意大幅下挫，好彩有本地遊生意幫補吓，所以成個部門嘅生意額都只係跌咗三分之二。
﹙圖﹚擁有三百幾間房嘅半島酒店喺疫潮中企硬唔減價，所以生意額甚差。
傳真︰2623-9278
電郵︰