昨日有任職經紀的女讀者向本報投訴，指李彩樺父母因炒股欠下十二萬元，多年來僅償還二萬多元，較早前李父開出兩張期票償還餘數，其中二月到期的四萬多元支票遭彈票。李母昨日聲稱已與李父離婚，所以李父挪用其戶口炒燶股票與她無關，又指李彩樺與父親亦沒有聯絡。
李彩樺（阿Rain）的父母今年三月在其上環寓所租客退租後，開出退還兩個月按金的支票遭彈票，當時李彩樺解釋是母親誤開父親的支票，才出現彈票情況。昨日本報再接到一名女經紀投訴，指李彩樺的父母欠她約十萬元多年不清還，今年一月李彩樺的父親開出兩張期票還錢，銀碼分別是四萬三千元和六萬三千五百六十三元八角，其中一張二月二十五日到期的支票已遭彈票，女經紀正考慮採取法律行動。
該女經紀透露自己於證券行任職，十年前經朋友介紹而認識李彩樺的父母，李母隨即在女經紀的公司開了一個股票戶口。女經紀指九九年至○○年期間，李彩樺的父母炒股輸了逾十二萬元，當時因公司追數，女經紀於是先行代李彩樺的父母墊支該筆款項，但李彩樺的父母事後卻一直拖得就拖，至今只還了二萬一千元。
女經紀昨日在電話中說：「我識咗李彩樺嘅父母好多年，我幫佢哋填嘅數係真金白銀，初時李太同我講，個女就嚟畢業，有幾個廣告搵佢拍，拍心口話一定還錢畀我，跟住就次次話下個月還，到下個月又話慢慢還。之後佢哋要求我公司出一封信，證明之前我幫佢哋填咗數，公司亦照做，但到𠵱家我都收唔返錢。
「呢兩年佢哋分三次總共還咗二萬一千蚊，近來佢哋搬咗屋，屋企電話都改咗，我打李彩樺阿爸嘅手提搵到佢，一月份嘅時候佢話還錢，開咗兩張期票畀我，二月到期嘅四萬幾，十一月到期嘅六萬幾，二月嗰張已經彈咗票，十一月到期嘅票重有可能過到數咩？
女經紀續說：「股票戶口係李太開嘅，之後就兩公婆一齊炒股票，今次嘅期票係李彩樺阿爸開嘅，其實未蝕錢之前，佢哋賺咗十六萬幾，公司開嘅支票，係開李太個名，冇理由賺錢就識收錢，蝕錢就唔還錢啫！我頭先打過李彩樺阿爸嘅手提，電話已經停止服務，我打佢個仔嘅電話，個仔一聽係我，即刻cut我線，如果佢哋肯同我講吓數，就算我收少啲都唔緊要，但佢哋傾都唔肯同我傾。我今日都有同律師商量，如果真係唔還錢，我會出律師信畀佢哋。我已經係六十幾歲嘅阿婆，冇乜能力再搵錢，希望佢哋可以畀番啲錢我。」
而李彩樺母親昨日經女兒所屬的金牌經理人公司回覆，指自己跟李彩樺的父親已離婚，而炒燶股票的是李父，與她無關。經理人公司黃小姐在電話中說：「阿Rain媽媽話個股票戶口係佢開，但係阿Rain爸爸炒燶咗，啲支票都係佢爸爸開嘅，佢喺冇阿Rain媽媽授權下炒燶咗股票，佢媽媽都唔知應該點追究，佢都係受害者，邊個炒就追番邊個囉。
黃小姐續說：「阿Rain父母離咗婚，佢哋冇聯絡，都唔知個agent重追緊數，亦唔知彈票嘅嘢。阿Rain只知佢爸爸爭人錢，佢同爸爸都已經冇聯絡。」但問到李彩樺的父母離婚多久時，黃小姐則表示不知道。
雖然李彩樺母親聲稱已與丈夫離婚，不過今年三月遭租客投訴彈票時，李彩樺曾解釋是母親誤開父親的支票簿，現在卻忽然又指二人已離婚兼冇聯絡。
採訪：張止寒、蔡如玉
攝影：汪正文
