最近睇電視，除咗「我要唱K，我要唱K」的大量卡拉OK廣告之外，大熱放送的還有鋪天蓋地的精選雜錦唱片廣告。中文、英文、日文、韓文、電影、電視、跳舞歌、情歌、新歌、舊歌，差唔多係噏得出嘅種類都有精選雜錦唱片。
兩、三隻唱片，幾十首金曲，都係賣一隻碟價錢，有啲重係幾大公司泊碼頭，每間公司拎幾首金曲出嚟，加加埋埋成為一隻唱片，望落幾乎似十足勁歌金曲金榜名單。此熱潮擺明係對抗科技，斬腳趾避沙蟲，橫豎大部份樂迷都已學識用唔同途徑下載歌曲，差唔多等於冇成本地製作唱片，正所謂唔啱揀到啱，有爛包換，集齊一套後自己燒隻碟畀自己。咁都唔止，撞啱過時過節，有人生日，呢種家庭式ＤＩＹ雜錦唱片重係幾受歡迎嘅禮物，除咗音質差啲同埋犯法之外，真係實惠兼方便。
唱片公司惟有用賣大包價錢推出精選雜錦唱片，就算只有微利都在所不計，希望能薄利多銷，正所謂呢啲錢不賺白不賺，但長遠計，始終好似唔多妥。
科技的進步似乎在跟音樂工業在開玩笑，不過業界人士一定笑唔出，音樂下載科技一日千里，但又冇辦法可以收到錢，眼白白見財化水。卡拉OK方面的收益或許可當成一種補貼，但提防網上卡拉OK的出現，到時大家安坐家中對牢電腦芒大唱飲歌，一樣可以合唱情歌，只爭冇得攬、冇得錫，如果真係有咁一日，諗起都暈得一陣陣。