由大業主持有嘅商場，都紛紛大搞優惠吸引消費者，內容愈嚟愈筍。荃灣愉景新城商場，今個禮拜六起至6月1號，逢禮拜六同日，消費滿五百蚊或以上，可以換到二百蚊商場購物禮券。
為令每層嘅商戶都有生意做，顧客一定要去齊三層消費，每層最少幫襯一間商舖，每張發票要百五蚊或以上，先至可以換到上述購物禮券，每日名額七百個。
每張一百蚊或以上嘅發票，可以換到「兒童卡通影院」入場券一張，滿二百五十蚊嘅發票，就可以換到「防炎消毒包」，內有口罩兩個、外科手術手套一對同殺菌濕紙巾五包。唔使消費都有一個鐘頭免費泊車優惠。
另外，信和第二次搞嘅屯門市廣場「信和商戶心連心開倉大行動」，禮拜日結束，當日重有明星表演，又有移交支票畀紅十字會嘅儀式。信和重透露，遲啲重會搞個「六百萬元大抽獎」，送出多個現金獎、名貴禮品同埋泊車優惠等，聽落都幾吸引。睇嚟商場推廣戰已喺無聲無息中爆發嘞，消費者點都係最大得益者。
樓市喺今個月好番啲，代理收入都有改善，美聯又一村達之路分行成績最好，成為本月第一間佣金突破百萬嘅分行，區域經理張洽民話，原因係畢架山一號暢銷，造就佳績。
張洽民透露，區內嘅雀橋街分行都唔弱，日前一日做咗五宗畢架山一號成交，總值約四千萬元，呢間分行嘅主管曾凱群，重獲得長實高級營業經理郭子威嘉許表揚㖭。
密集式嘅宣傳推廣活動，差唔多成為發展商推盤定律。好似少有喺香港賣新盤嘅和黃，近排就密鑼緊鼓忙緊推介藍澄灣，噚日今日同聽日，都有連串發布會，宣傳攻勢唔比同系長實弱。未有全新項目賣嘅長實，就繼續搞貨尾盤推廣，今日芸芸記者會中，淨係長和系就包辦三個，藍澄灣之外，重有畢架山一號同泓景臺。
唔知係咪因今個禮拜四係長和系嘅大日子，即周年股東會嘅關係，搞記招都要讓路，所以啲記者會堆晒喺呢幾日？到目前為止暫未聽到話禮拜四有記招。
樓市受非典型肺炎打擊，唔少投資者都暫停入市，旭日國際主席蔡志明早前就講過，旗下物業包括商場、寫字樓同豪宅，都受非典影響，所以暫時擱置傾緊嘅投資項目。不過，蘭西收到料，話蔡志明上個禮拜現身大埔鹿茵山莊，據聞是有意大手洽購。蔡志明再度出手，係咪意味樓市已經有番啲起色呢？蔡生𠵱家共持有九個鹿茵山莊單位收緊租。
香港地差唔多個個都話識講樓市，但準嘅就唔多，不過利嘉閣呢期都幾準，喺3月初預告豪宅會逆市升，結果4月多個豪宅盤都賣得唔錯。喺4月初，利記又指住宅買賣喺5、6月會出現小陽春，而今個月上半月，一手成交比上月同期多近一倍。
噚日利記喺中環董家菜搞記招，董事總經理何紹章（圖三）食完後，重喺菜館嘅玻璃度簽名㖭，唔好睇小呢塊玻璃，保安局局長葉劉淑儀都有留名，重有其他名人如唯靈、李智康同邱淑貞等。何紹章就話唔敢同葉太睇齊，只喺角落搵個位簽名。
蘭西
電郵地址：
