一件見得吓人嘅三點式泳衣，閒閒地五百蚊樓上，如果以布料多少計算，價錢真係貴過唔少人氣名牌衣着；所以，保養呢類比堅尼泳衣就要特別注意。
今時今日，泳衣嘅設計除咗以款式多變吸引顧客外，用料亦十分講究。為咗畀顧客一種貼身舒適嘅感覺，泳衣生產廠會選用較為脆弱嘅彈性纖維。據Quiksilver錢小姐講，比堅尼嘅最佳保養方法就係每次游水後，先在岸邊沖水，洗去鹽份同化學物質。至於正確嘅清洗方法，就係用手洗，之後以大量清水沖洗同浸泡，但就切勿乾洗及放入洗衣機榨乾。
收藏方面，為免一件靚靚嘅比堅尼變形，緊記唔好擠壓罩杯及鋼圈。如果每次游水後都記得以上步驟，一件幾百蚊嘅寶貝三點式分分鐘可以着得兩至三季。