新款越野路華Discovery去年在港推出以來，一直備受車迷追捧，皆因佢設備齊全之餘，重有出色嘅性能表現；今回代理方面再接再厲，運嚟全新DiscoveryS型號抵港，雖然新車刪減咗部份豪華設備，但唔使46萬嘅售價，比起原有頂級型號足足平出14萬，響現今苛稅猛於虎嘅政策下，更能加添多一份號召力呢！
記者：鄭達基 攝影：陳偉林
逢星期一至日刊出
響大家眼前呢部全新越野路華DiscoveryS，外形設計仍保留有原車一份四驅SUV應有嘅剛強個性，惟獨四輪合金胎軨組合，由頂級版所配用嘅18吋改為16吋配搭，但車子望落仍有一份吸引力㗎！
早前，越野路華香港代理將原來設於九龍土瓜灣嘅Showroom，搬到去有「香港汽車街」之稱嘅灣仔告士打道；新Showroom不但較前更「就腳」，方便來自香港各區嘅車迷外，以前後舖形式出現嘅新Showroom，內裏空間亦較前來得寬敞闊落，不但能擺齊越野路華旗下各個車款，而且重可以讓車迷有一個更舒適嘅環境睇車同買車㖭！有興趣嘅朋友，不妨到位於灣仔告士打道181-185號中怡大廈地下嘅全新越野路華陳列室參觀喇！
就打開車門所見，新車三排座椅摒棄咗頂級版型號嘅真皮包裝，改以高級絲絨鑲嵌而成，但仍能予人一份頗高承托力及優雅嘅觀感；當中後排座椅屬獨立設計，日常毋須使用時可將之左右獨立收摺起，遇有需要時更可將中排座椅一併收摺起來，以增加尾廂載物容量。設備配搭方面，雖然無咗天窗，以及換裝上一套音色更傳神嘅全新音響組合外，其餘設備如車門電窗、門邊電鏡及恒溫冷氣等等，全都保留下來，而且使用時亦相當方便容易。
與頂級版一樣，全新DiscoveryS同樣以一台4.0公升V8SOHC偈作動力核心，並配以4前速自動波及恒式四驅裝置，加上一套16吋輪胎組合，不但能夠切合全天候行車需要，經過改良嘅懸掛系統，輔以多套先進電子裝備，如越野路華獨有嘅HDC下坡裝置，同埋ABS、EBD及ETC等基本電子配備，從而令車子有更可靠嘅一面呢！
雖然新近抵港嘅越野路華DiscoveryS，刪減咗部份豪華配備，如真皮座椅、天窗等等，但仍無損其豪邁一面，加上車子無論響On-road抑或Off-road都有出色表現，以比頂級版平出14萬嘅車價睇嚟，可謂甚具號召力㗎！
引擎：3950ccV8SOHC
馬力：184ps/4750rpm
扭力：34.7kgm/2600rpm
傳動：4前速自動波，恒式四驅
懸掛：（前）柱式獨立（後）雙連桿
制動：（前）透氣碟（後）碟式（ABS）
輪胎：235/70R16GoodyearWranglerHP
尺碼：4705×2190×1980mm
軸距：2540mm；車重：2095-2305kg
0-100公里：12.8秒；極速：170km/h
平均耗油：16.7L/100km
新車售價：$459,900
車輛提供：越野路華香港（27132383）