八方早前講過白鴿黨前主席李柱銘嘅愛子Joey因沙士不敢返港，翌日收到Joey嘅長途電話，話要澄清佢唔返嚟嘅真正原因，係因為衞生福利及食物局局長楊永強失職；若非楊局長一開始時掉以輕心，香港點會搞成咁？佢重話，老董其實或多或少俾佢啲司長局長害死。
Joey雖然喺英國讀經濟，但係講到政治，都頭頭是道，成個馬丁咁款。佢話復活節返唔到嚟最大嘅遺憾係錯過咗董太扮超人嘅情景，佢話既然董太每次出嚟都為港人帶來歡樂，不如畀佢多啲出鏡，好過見到老董木口木面個樣。
八方問Joey，點解唔跟佢老竇讀法律，佢話香港已經太多律師，所以讀經濟，考埋大考，一個月後就畢業返港搵嘢做，至於讀唔讀碩士，遲吓先算。如果你個阿爸叫馬丁李，又係唔需要諗咁多嘅。
﹙圖﹚董太呢個超人Look的確經典，令人笑到碌地。
傳真︰2623-9278
電郵︰