羅新基等咗三個幾月，終於都等到SonyEricsson部T610正式派貨落場，雖然官方公布有三隻顏色，不過現時只有銀色落場，紅色同黑色就要遲一步先到，羅新基都要繼續等吓。雖然係咁，T610一樣咁搶手，而且更罕有出現炒價，由官方價錢$3,380炒至$3,880，搞到唔少做緊官方價嘅網絡商同細舖都缺晒貨，相信SonyEricsson高層一定飲得杯落。
羅新基日前掃場時，發現有部同PanasonicGD88有九成相似嘅新機，型號就稱為GD86A，有齊GD88嘅相機功能、65,536色彩芒、和弦同埋GPRS，但係價錢就比GD88貴成千蚊，開價$4,180，不過同GD88唔同就係內置記憶體增加咗，可儲存200個短訊，啱晒成日玩短訊嘅朋友，同埋可以收發Email，商務人士都夠晒用。
查詢：電訊世界（23911810）
三星部紅色鋼琴手機A500深得唔少女性用家歡心，不過只得英文版就稍為不足，好多人都希望會推出中文版，呢個願望就由內地手機品牌「科健」完成，呢部型號K308（左）手機外表同A500（右）一模一樣，功能更加出色，支援繁簡中文之外，更升級加入65,000色彩芒，而WAP、40和弦鈴聲及來電圖片亦唔少得，最特別就係用上中國足球明星李鐵做Wallpaper，中國足球Fans最啱！售$2,980。
查詢：鉑匯電訊（23987320）
文：羅新基