發展商賣樓前，都會做好多宣傳推廣工夫，通常盡量把所有樓盤資料展示畀人睇，但係假如去到一個新盤展覽攤位，完全見唔到實質資料，好似外貌相、平面圖、設施等，乜都欠奉，你會有乜感覺呢？
太古地產鰂魚涌逸樺園，今日開始至禮拜五，喺鰂魚涌太古坊舉行「思想·家－逸樺園」嘅展覽，展示好多設計師嘅獨特家具同家居擺設。
太古地產高級營業經理馬淑貞話，呢啲擺設，代表唔同嘅思想空間，反映設計師對「家」嘅細密心思，重可以為參觀者帶嚟更多家居設計意念。
不過，蘭西聽講，呢個展覽如果個唔係有個樓盤名喺度，好難估到原來係做緊樓盤宣傳。太古宣傳手法，果然夠突出。
繼元朗綠庭園之後，和黃啱啱攞到售樓紙嘅青衣新盤藍澄灣，今日就即刻展開宣傳攻勢。
和記地產董事總經理徐建東介紹個盤嘅主題，重有就係會所設施。呢個「藍澄會」會所，耗資1億元興建。
點解要咁多錢？同埋究竟裏面有啲乜嘢設施？今日應該會揭曉。
另外，新地即將開售嘅元朗YOHOTown，喺沙田新城市廣場搞咗個展館，過去兩日，共有逾三萬參觀人次，一半係新地會會員。
過去兩日，有兩千幾人加入成為新地會會員。
非典威脅漸減，但各界防炎意識冇鬆懈。長實兩間物業管理公司港基與高衞，噚日就由長實執行董事趙國雄、港基總經理曾玉瑛、高衞總經理詹洪堅，以及逾百名前線員工，出席簽署「心連心全城抗炎大行動」衞生約章儀式。
長實管理住宅有八萬八戶，商場寫字樓等商業樓面，總共有九千萬呎。
商住物業採取嘅防炎措施大致相若，較少提及嘅，係每座大廈𨋢掣位置，裝上自動感應消毒機。
另外，住客會所康樂設施，會加強消毒工作，好似健身中心器材，每次都會消毒，之後至畀下一位用。至於商場及商廈，會設立中央統籌委員會，以及應變小組。總之，有事就可以即時處理。
住南豐樓，原來會有意想不到嘅「着數」。蘭西聽講，南豐將軍澳慧安園，住戶憑4月份管理費收據，可以攞到兩張素食代用券，每張四十蚊，去屋苑商場將軍素食，當現金使，噚日就係最後使用限期。
呢兩張代用券係由隱名氏贈送。不過，聽講唔係每個南豐屋苑都有得送贈。
將軍素食，係由南豐大老闆陳廷驊開辦。陳廷驊誠心向佛，積極弘揚佛法，重好鼓勵大家信佛。唔知佢老人家，會唔會就係呢個隱名氏呢？
素食對身體有益，近年重愈嚟愈多人食素㖭。啲住客攞住張代用券，去食齋嘅時候，會否體會到呢個隱名氏嘅心意呢？
馬會過去兩日搞招聘會，要請三千六人。今時今日，唔少公司裁緊員嘅市道，真係可以話「空前」。
估唔到前去應徵嘅市民重誇張，總共有成五萬。上周六第一日，佔近四萬人，排隊嘅人龍，由灣仔延伸到中環，有啲重係通宵輪候㖭。
睇見呢啲人龍，好多人都會諗番起，九七年樓市高峯期，青衣灝景灣開賣，上萬市民排隊認購嘅場面。𠵱家樓盤若果有幾百人排隊買樓，已經係大新聞嘞。
估唔到幾年之間，香港樓市會搞成咁，真係不堪回首。
蘭西
電郵地址：
