昨日去到喺維園首度正式曝光嘅周日跳蚤市場「Farm」，重以為自己身處日本原宿代代木公園！場面一樣，型！擺滿百幾個地攤，二手衫、名牌袋、玩具、DIY飾物……乜都有，要搵型人亦話都無咁易。我們一於來個現場直擊，睇吓呢個新鮮熱辣型人蒲點有幾正！
記者：招佩珊 攝影：陳智良
逢星期一至五刊出
真係唔好意思，我因利乘便，以記者身份率先入場，一殺入去，就火速行咗一Round，掃掃有乜筍嘢。成個場差不多有接近120個地攤，有私人珍藏嘅古董相機、玩具、CD，亦有全新或半新嘅名牌衫褲鞋襪，而且大多數都係時下年輕人追捧嘅牌子，Supreme、APE、Potter、Hysteric……無他，檔主全部都係年輕人，賣嘅當然係後生仔嘢，原來呢啲衫褲鞋物都係檔主嘅心頭愛，不過，佢哋話橫掂都唔啱着，有啲重係買咗都未着過，與其堆喺屋企，倒不如賣咗去套現咁話喎！
個場十一點先至開，但十點幾已有三、四十人企響外圍。終於放人入場喇！啲人一窩蜂衝入嚟，經濟低迷，好耐未見過咁嘅墟冚場面啦！話咁快，就發現有兩類地攤最多人圍住，分別係賣潮流品牌衫褲同埋賣懷舊玩具擺設嘅。好似喺70年代玩嘅鐵皮車仔，60、70年代嘅勁懷舊Feel電話、鐘同床頭燈，若然你都係呢類「舊嘢」嘅忠實擁躉，隨時執到寶。至於衫褲鞋襪呢類品牌嘢，年輕人就最愛，小記問過幾個後生仔，佢哋話有啲貨係檔主自己喺外地親自入貨，街舖未必搵到，所以隨時有意想不到嘅收穫。
喺呢個大型跳蚤市場內，除咗貨品夠型，型仔型女都一樣睇到你眼花撩亂，皆因無論係檔主抑或入場人士，大部份都打扮得好鬼型，唔信？有辦你睇，想變型人就可以喺佢哋身上偷吓師！
逢星期日開放（至11月底）
時間：上午11:00至下午6:00
地點：銅鑼灣維園噴水池附近