為觀眾帶來不少歡樂的周星馳，雖然小時候家境清貧，吃的是豉油撈飯，住的是板間房，但星爺仍自得其樂，只是他幾歲大的時候，曾為了買玩具機械人，而令屋企冇錢開飯，父母更因而「吵大鑊」。
周星馳（星爺）小時候家境清貧，一家五口擠在狹窄的板間房內，睡的是碌架床，吃的是豉油撈飯，生活就有如粵語長片中的情節一樣。
不過，儘管星爺童年生活艱苦，他卻自得其樂，星爺日前談及他的童年往事時，一本正經地說：「我幾歲嗰陣，有好多餐食豉油撈飯，之但係食豉油撈飯都有樂趣㗎，好似撈多啲同撈少啲，味道已經好唔同，嗰陣時我成日同妹妹研究點樣撈先至最好味，有時加多些少熟油就重惹味㖭！可能當時年紀重細，所以唔會覺得辛苦，淨係覺得好好玩！」
至於家中的碌架床，原來是他小時候的歡樂天地，星爺笑說：「爬上爬落真係好好玩架，重可以捐㖭呢！不過，個陣時見到其他小朋友有玩具玩，當然好羨慕啦，記得有次同父母行街見到一個玩具機械人，我賴死唔走，係都要佢哋買，我老竇話買畀我，但阿媽就話買咗就冇錢開飯，雖然到最後佢哋都買咗畀我，但佢哋亦因為買同唔買嘅問題，嗌咗一場大交。而大概喺我六、七歲個陣，佢哋重離埋婚㖭。」
從小便是李小龍迷的星爺，為了學習偶像的好身手，竟將省下來的零用錢買了一個大沙包，掛在又迫又窄的家中，誓言要學李小龍練功夫，將星媽氣得半死，星爺說：「屋企人好唔滿意㗎，出出入入都要閃避，佢哋話屋企已經咁細，我擺個大沙包喺度無疑係雪上加霜，但我依然擺喺度。」
所謂少年不識愁滋味，星爺因為受到李小龍影響而加入娛樂圈，成為觀眾們至愛的超級偶像！也許，正是那個大沙包，改變了星爺的一生呢！
採訪：戴彩煥
