陳奕迅（Eason）、梁漢文、何韻詩同容祖兒噚日去銅鑼灣世貿中心為呢個星期六舉行嘅「1:99音樂會」推銷門票，希望多啲人購票支持，身為發起人嘅梅艷芳亦有到場支持。
起初圍觀市民嘅反應都唔係太過熱烈，好彩經過四位歌手用搞笑嘅方法呼籲之後，買飛嘅人先至多啲。
梅姐話之前親自畀電話向太陳嵐叫佢畀張栢芝出席音樂會，梅姐重話鄭秀文嘅哮喘情況已經好咗好多，當日佢都會上台表演。
之後，梁詠琪、楊千嬅同埋蘇永康就去到沙田新城市廣場呼籲，而在場嘅市民亦都好踴躍買飛支持，據知兩個地方總共賣出近二千張嘅「精裝紀念愛心券」。
無綫劇《鳳舞香羅》有好多靚人靚衫，好似吳美珩咁，佢為咗完美，成日都出動私伙衫，噚日佢同向海嵐、江華同魏駿傑拍一場開張戲，就成身二十年代打扮，但係睇真啲條裙就好似有少少怪，吳美珩話：「係唔係覺得好似枱布，我之前做過資料搜集，當年嘅人係興呢啲，我重要係一個名歌女，所以打扮都好前衞。」
周杰倫前晚喺吉隆坡舉行演唱會，雖然非典型肺炎搞到好多歌星都唔敢喺東南亞舉行個唱，但周杰倫呢次演出就反應甚佳。佢喺個唱中換咗成十套衫，又着咗一套特別為今次演出而訂製嘅火紅盔甲戰衣上陣，加上佢大晒十八般武藝，耍劍、玩雙截棍同打籃球樣樣齊，而佢重識做到將《IBelieve》嘅歌詞改編，唱好大馬，又承諾下年喺大馬再開個唱。
譚朗昌涉盜錄內地電視劇《斷仇谷》，日前喺瀋陽審結，佢要賠七十五萬畀華藝公司，支付十九萬堂費同被判刑八個月。譚朗昌預計日內就會返香港，爾冬陞前晚喺電話度話：「總之大家唔使緊張，佢日內返嚟，休息一兩日就會交代一切，佢都知大家好關心佢。」
林敏而（前名林敏怡）日前接受港台節目訪問。
林敏而話曾搵哥哥（張國榮）做佢新舞台劇嘅主角，佢話：「好唔開心，我call過佢（哥哥）佢冇覆我機，不過，我終於明白點解！本來想搵佢做舞台劇嘅主角，係天使嘅角色，不過可能𠵱家哥哥都做緊天使啦！」
