陳大嚿偉業議員膽敢喺立法會質問特首關於中央罷官一事，特首發威低吼一聲：「膚淺」。呢個答案簡單到令人摸不着頭腦，特首好少扮高深嘅噃，點解呢次扮得咁有型？
左思右度之後，醒起Ｌ夫子前幾晚食飯（立法會答問大會之前）曾經講述過炒京官之謎。當時Ｌ夫子話：「中央罷免張文康、孟學農，好高深㗎。年初廣東發生沙士，已經有人報上京都，但因為中國三十五種傳染病之中，冇「沙士」呢項，所以唔需要當傳染病咁樣及時滙報。衞生部派過人到廣東，知啲唔知啲，但適值人大開會，於是全部人要識做，穩定壓倒一切吖嘛，張文康、孟學農邊度有膽一手遮天呀。」
既然如此，左丁山可以接力猜度落去，世衞組織懷疑中國隱瞞，又有一位名門之後蔣彥永醫生寫信畀《時代週刊》踢爆，於是順水推舟，一於揮淚斬馬謖（有冇眼淚，我哋睇唔到），斬完之後就可以轉軚，轉得好漂亮㖭，一來可以即刻公佈真實「沙士」數字唔使面紅，二來立晒威，地方官吏立即震晒，三來博得世界掌聲。做馬仔嘅，要隨時準備為老細犧牲，明白老細棄車保帥嘅道理，如果戀棧不走死拉住老細隻腳，老細又竟然心軟，唔踢開馬仔，結果就係馬仔攬住老細跌落地下，一齊灰頭灰面。
呢個道理好高深㗎，大嚿陳大概冇研究中國官場歷史，抵佢俾特首鬧：「膚淺！」